Кибет хезмәткәрләре өчен укыту семинары үткәрелде
Татарстан Республикасы Дәүләт алкоголь инспекциясенең Чистай территориаль органы хезмәткәрләре Роспотребнадзорның Татарстан Республикасы буенча идарәсе бүлеге хезмәткәрләре белән берлектә Алексеевск бистәсендәге «Магнит» кибетендә укыту семинары үткәрделәр.
Сатучыларга «Кулланучылар хокукларын яклау турында» РФ Законы таләпләрен үтәүнең мөһимлеге турында сөйләделәр. Семинар кысаларында товарлар маркировкасын үтәү, товарлар мониторингы системасына «Гадел билге»не тоташтыру мәсьәләләре каралды.
Чарада катнашучыларга сатучы һәм сатып алучының хокукый мөнәсәбәтләре, товарлар һәм хезмәтләр сатканда кулланучылар белән исәп-хисап ясау, оешмаларның тикшерүләр уздыру вәкаләтләре турында сөйләделәр. Моннан тыш, сатучының кулланучыларга кибетнең эш режимы турында, шулай ук сатыла торган товарлар турында аларны дөрес сайлап алу мөмкинлеген тәэмин итә торган кирәкле һәм дөрес мәгълүмат бирү бурычы каралды. «Кулланучылар хокукларын яклау турында» РФ Законының 12 маддәсенең 1 пункты нигезендә, әгәр кулланучыга килешү төзегәндә товар турында мәгълүматны кичекмәстән алу мөмкинлеге бирелмәсә, ул тиешле срокта килешүне үтәүдән баш тартырга һәм товар өчен түләнгән сумманы кире кайтаруны һәм зыянны каплауны таләп итәргә хокуклы.
Чара кулланучылар хокукларын яклау өлкәсендә мәгълүмати-белешмә материаллар тарату белән үрелеп барды.