Кукмара районының Түбән Русь авылы гражданнары белән очрашу
Татарстан Республикасы Дәүләт алкоголь инспекциясенең Арча территориаль органы хезмәткәрләре Кукмара районының Түбән Русь авылында гражданнарны кабул иттеләр.
Мөрәҗәгать итүчеләрне кулланучылар базары өлкәсендә барлыкка килә торган сораулар кызыксындырды. Мәсәлән: гарантия срогы билгеләнмәгән очракта товарда кимчелекләр табылганда кулланучының нинди хокуклары бар; сатучының көнкүреш техникасы сатып алганда өстәмә хезмәтләр тагарга хокукы бармы? Барлык сорауларга да тулы җаваплар бирелде.
Үз эшчәнлекләрен Кукмара районында алып баручы шәхси эшмәкәрләр И.Я. Мостафин, Р. М. Фатихов һәм «Авылым» ҖЧҖ сәүдә объектлары сатучылары өчен законнарны аңлатып семинар үткәрелде. Чара барышында мәгълүмат стендында кирәкле документлар булу, сатыла торган азык-төлек товарларына бәяләрне рәсмиләштерү һәм урнаштыру буенча тәкъдимнәр бирелде. Очрашуның төп темасы – кулланучыларга тәкъдим ителә торган товарларның сыйфаты турында сөйләшү булды. Сатучыларның игътибары сатып алучыларга хезмәт күрсәтү культурасына да юнәлтелде.
Шулай ук Татарстан Республикасы Министрлар Кабинетының «Татарстан Республикасы дәүләт һәм муниципаль оешмалары сатып ала торган азык-төлек товарларына максималь бәяләр булдыру турында» 2017 елның 25 сентябрендәге 715 номерлы карары нигезендә азык-төлек товарларына бәяләр мониторингы үткәрелде.