Авыл хуҗалыгы ярминкәсендә аңлату эшләре башкарылды
Баулыда Өлкәннәр көненә багышланган авыл хуҗалыгы ярминкәсе узды. Крестьян-фермер хуҗалыклары, шәхси эшмәкәрләр яңа җитештерелгән продукциянең киң ассортиментын тәкъдим иттеләр: яшелчә, җиләк-җимеш, ит, сөт әйберләре, бал һәм башка җирле товарлар. Ярминкә шәһәрнең һәм якын-тирә районнарның күпсанлы халкын җәлеп итте, сыйфатлы һәм табигый продуктлар яратучылар өчен чын бәйрәмгә әверелде.
Әлмәт территориаль органы белгече Баулы муниципаль районының икътисад һәм территориаль үсеш бүлеге баш белгече белән берлектә ярминкә эшендә катнаштылар. Алар сәүдә Кагыйдәләрен үтәүнең мөһимлеген, базарда катнашучыларның хокукларын һәм бурычларын искә төшереп, сатып алучылар һәм сатучылар белән аңлату әңгәмәсе үткәрделәр.
Белгечләр аңлатканча, һәр сатып алучы товар, аның килеп чыгышы, яраклылык сроклары һәм саклау шартлары турында тулы һәм дөрес мәгълүмат алырга хокуклы. Шулай ук сыйфатсыз продукция табылган очракта куркынычсыз сатып алулар һәм гамәлләр буенча киңәшләр бирелде.
Килүчеләр кызыксындырган сорауларын бирде, консультацияләр һәм кулланучылар хокукларын яклау турында белешмәләр алды. Мондый чаралар җирле җитештерүчеләргә ярдәм итәргә генә түгел, гражданнарның хокукый белем дәрәҗәсен дә күтәрергә ярдәм итә.