Җаның теләгәнне сайла

Бүген Дәүләт алкоголь инспекциясендә мерло һәм шардоне шәраблары арасыннан иң яхшыларын сайладылар. Белгечләрне, гади кулланучылардан аермалы буларак, шәрабның тәме генә түгел, төсе дә кызыксындыра. Хәзер инде Алия Сафина, Александр Решеткин кебекләр нәрсәгә өстенлек бирергә кирәклеген бик яхшы белә. Ярым татлы әйбәт шәрабтан җиләк, җиңелчә генә чәчәк, хәтта сөт исе-тәме килеп торырга тиеш. Бүген нәкъ менә шундый шәрабның тәмен татып карау булды да инде. Дегустациядә барлыгы 11 үрнәк тәкъдим ителде. Болар – Болгариядә, Молдавия, Сербия, Россия, Татарстан Республикасы һәм Кырымда җитештерелгән шәраблар. Әйтергә кирәк, татарстанлылар кояшлы Кырым ярымутравыннан китерелә торган шәрабларга торган саен күбрәк өстенлек бирә башлады. Этил спирты һәм алкогольле продукция җитештерүне, аның әйләнешен һәм сыйфатын дәүләт контролендә тотуны тәэмин итү һәм кулланучы хокукларын яклау буенча Татарстан Республикасы Дәүләт алкоголь инспекциясе җитәкчесе урынбасары Рөстәм Арсланов: “Кулланучылар иң беренче чиратта продукциянең бәясе һәм сыйфатына игътибар иткәнлектән, бүген без бәясе 300 сумга кадәрге очсызрак шәрабларга тукталырга булдык. Болар барысы да – 3 елга кадәр тотылган яшь шәраблар. Араларыннан иң яхшыларын сайлап алуда төп критерийлар исә – төре, хуш исе һәм дә тәме. Бокал читләрендә майлы тапларның калуы шәрабта виноград сыгынтысының күп булуы, ягъни аның табигыйлыгы турында сөйли. Ак шәрабның төсе хәтта яшькелтрәк тә, кызыл шәрабныкы — чия кызыл төсендә булырга мөмкин. Классик мерло шәрабын берни белән дә бутап булмый. Аннан кызыл җимешләр, кара һәм кызыл карлыган тәмнәре килә” - , диде. Ә менә шардоне тәме – бөтенләй башкача. ГБУ “РЦНЭ и МПР” сынау лабораториясе начальнигы Наилә Сәрвәрова бу җәһәттән: “Виноградның сорты шардоне булганлыктан, ярымтатлы бу шәрабтан кыр чәчәкләре исе, җиңелчә генә бал тәме килә. Ярымтатлы шәрабларда бал тәме тоя башлагансыз икән, димәк, сез бу шәрабны танып белүдә камиллеккә ирешкәнсез дигән сүз”, - дип билгеләп үтте. Тик барыбер шәрабларның баш әйләндергеч хуш исләре экспертларның башын әйләндермәде. Соң, үз эшенең осталары ич... Иң яхшы шәраблар исә асылда бертавыштан билгеләнде. Сербиядә җитештерелгән шардоне һәм Краснодар краеның мерло шәрабы җиңүчеләр итеп билгеләнде. Татарстанда җитештерелә торган эчемлек тә лидерлар сафына чыкты әле