Техник яктан катлаулы товарда кулланучы тарафыннан җитешсезлек ачыкланса, ул сату-алу килешүен үтәүдән баш тартырга хокуклы
Түләүсез консультация ярдәме күрсәтү, кулланучылар базары өлкәсендә эшчәнлек алып баручы кече һәм урта бизнес вәкилләренең һәм эшкуарларның хокукый грамоталылыгын арттыру максатыннан, Түбән Кама территориаль органы хезмәткәрләре даими рәвештә хуҗалык итүче субъектлар белән очрашулар, әңгәмәләр, «түгәрәк өстәлләр» үткәрәләр. Шулай итеп, кулланучы мөрәҗәгате буенча эчке базарны үстерү һәм координацияләү бүлеге белгече тарафыннан техник яктан катлаулы товарлар, атап әйткәндә, автомобильләр өчен товарлар сатыла торган сәүдә объектына чыгу оештырылды. Түбән Кама кешесе радар-детекторлы видеорегистратор сатып алган, унбиш көн эчендә товар эшләми башлаган. Кулланучы сатучыга мөрәҗәгать иткән, анда претензияне кабул итүдән баш тартканнар, ә сервис үзәгендә, визуаль карап чыкканнан соң, кулланучының гаебе дип нәтиҗә чыгарганнар. Кулланучы бу нәтиҗә белән килешмәвен белдерә.
Үткәрелгән чара барышында Түбән Кама территориаль органы хезмәткәрләре кулланучылар мөрәҗәгатьләрен карау тәртибе мәсьәләләренә кагылып үттеләр, гамәлдәге законнарга күзәтү ясадылар. «Кулланучылар хокукларын яклау турында» РФ Законының 18 статьясы нигезендә, техник яктан катлаулы товарда кулланучы тарафыннан җитешсезлек ачыкланса, ул сату-алу килешүен үтәүдән баш тартырга һәм шундый товар өчен түләнгән сумманы кире кайтаруны таләп итәргә яки аны шул ук маркадагы (модель, Артикул) товарга яки башка маркадагы (модель, Артикул) товарга алыштыру турында таләп куярга хокуклы. Сатучы (җитештерүче), вәкаләтле оешма яки вәкаләтле шәхси эшмәкәр, импортер кулланучының сыйфатсыз товарны кабул итәргә һәм кирәк булган очракта товарның сыйфатын тикшерергә тиеш. Кулланучы товарның сыйфатын тикшерүдә катнашырга хокуклы. Товарда җитешсезлекләр килеп чыгу сәбәпләре турында бәхәс туган очракта, сатучы (җитештерүче), вәкаләтле оешма яки вәкаләтле шәхси эшмәкәр, импортер үз хисабына товарга экспертиза үткәрергә тиеш. Кулланучы товарга экспертиза үткәргәндә катнашырга һәм аның нәтиҗәләре белән килешмәгән очракта мондый экспертиза бәяләмәсен суд тәртибендә бәхәсле дип игълан итәргә хокуклы.
Белгечләр, шулай ук сәүдә объекты җитәкчелегенең игътибарын җитештерүче (башкаручы, сатучы) - хосусый эшмәкәр - кулланучыга дәүләт теркәве һәм аны теркәгән орган исеме турында мәгълүмат бирергә тиешлегенә юнәлтте (РФ Законының 9 статьясы).