Кулланучы әлифбасы: кулдан техника һәм электроника сатып алабыз
Базардан кайбер Көнбатыш җитештерүчеләре китү сәбәпле, икенчел базары үсә һәм популярлык җыя башлады. Роскачество цифрлы экспертиза үзәге эшли торган җиһазларны дөрес сатып алу һәм алдакчылар тозагына капмас өчен киңәшләр бирә.
ИГЪЛАННАР ТАКТАЛАРЫНДА ТОВАР ЭЗЛӘГӘНДӘ НӘРСӘЛӘРГӘ ИГЪТИБАР ИТӘРГӘ
Электроника һәм техника сату буенча шикле һәм шиксез тәкъдимнәрне беренче чиратта игъланнарны фильтрацияләү этабында ук чыгарырга мөмкин. Моның өчен гади кагыйдәләрне үтәү дә җитә.
Сатучының профилен тикшерегез. Әгәр кулланучы берничә көн элек кенә теркәлгән булса, сайтка карата фикерләр булмаса һәм гаджетлар түбән бәягә тәкъдим ителсә, мошенникларга эләгү шансы бар. Сатучы турында фикерләрне өйрәнегез, элек ул нәрсәләр саткан. Әгәр сатучы соңгы тапкыр товарларны ике ел элек һәм терлекләр өчен азык саткан булса, хәзер кинәт кенә кыйммәтле смартфоннарны сатуга чыгарса, бәлки, аның аккаунтын мошенниклар ваткандыр.
Тәкъдим ителгән товарның фотоларын өйрәнегез. Фотоларның «тере», ягъни сатучының үзе ясаган фотосурәтләр булуы мәслихәт.
Гаджет турында техник мәгълүматны сорагыз. Мәсәлән, Apple җайланмалары өчен бу серияле номер һәм IMEI номеры. Аларны алдан ук мәгълүмат базалары буенча тикшерергә була. Әгәр нәрсә дә булса туры килми икән, бу җайланманы сатып алудан баш тарту өчен төпле сәбәп булып тора.
САТЫП АЛЫР АЛДЫННАН ҖАЙЛАНМАНЫ НИЧЕК ТИКШЕРЕРГӘ?
Электроника һәм эре техника өчен кагыйдәләр бераз аерылып торачак, шуңа күрә һәрбер төр турында аерым сөйләячәкбез.
Электроника
Сатучыдан җайланманы тулысынча эшкә әзерләүне сорагыз. Сатучы алып килгән планшетны тулысынча тикшерергә хокукыгыз бар. Әгәр җайланманың чегы һәм оригиналь тартмасы булмаса, димәк ул урланган булырга мөмкин.
Гаджетның тышкы ягын җентекләп тикшерегез.
Көнкүреш техникасы
Көнкүреш техникасы белән хәл башкачарак: габаритлар аркасында сезгә аның артыннан сатучы янына барырга кирәк булачак. Тик бу аны тикшерергә кирәкми дигән сүз түгел.
Техниканы алдан әзерләүне сорагыз. Мәсәлән, суыткыч яки кер юу машинасын эшләтеп карау мәҗбүри. Теләсә кайсы җайланма белән берничә кыска операция ясарга мөмкин, алар мөмкин булган җитешсезлекләрне ачыкларга ярдәм итәчәк. Суыткыч һәм суыту камерасы суытырга, ә кер юу машинасы – суны җылытырга тиеш. Шул ук хәл микродулкынлы мичкә, савыт-саба юу машинасына, пылесос һәм блендерга да кагыла: гадел сатучы җиһазны сынап карарга каршы булмаячак.
Техниканы визуаль рәвештә тикшерегез. Хәтта җиңелчә күзәтү дә ремонт эзләрен күрергә ярдәм итә. Әгәр берәр шикле әйбер тапсагыз – бу товарны сатып алудан баш тартыгыз. Прибор инде куллану срогы чикләрендә булырга мөмкин. Әгәр җайланма карау вакытында ук яхшы эшләми икән, ул соңрак бөтенләй дә эшләмәскә мөмкин.
Сатучыдан чек сорагыз. Шулай итеп, сез техниканың кайчаннан бирле куллануда булганын исәпләп чыгара аласыз. Барлык төр техниканың да төрле ресурсы бар: әгәр җайланма 10 ел элек сатып алынган һәм бу вакытта актив кулланылган булса, сез якынча бер яки ике ай гына эшләрлек техника сатып аласыз дигән сүз.
Сатып алынган техникада җитешсезлек ачыкланган очракта, сатучы юридик зат яки шәхси эшмәкәр булып торса, нишләргә?
Товарда җитешсезлекләр ачыкланган очракта, әгәр алар сатучы тарафыннан әйтелмәсә, кулланучы үз теләге белән түбәндәгеләргә хокуклы:
• шул ук маркалы (шул ук модель һәм (яки) артикул) товарга алыштыруны таләп итәргә;
• сатып алу бәясен тиешле яңадан исәпләү белән башка маркадагы (модель, артикул) товарга алыштыруны таләп итү;
• сатып алу бәясен тиешле киметүне таләп итәргә;
• товарның җитешсезлекләрен кичекмәстән бетерүне яки кулланучы яисә өченче зат тарафыннан аларны төзәтү чыгымнарын түләтүне таләп итү;
• сату-алу килешүен үтәүдән баш тартырга һәм товар өчен түләнгән сумманы кире кайтаруны таләп итәргә. Кулланучы сатучы таләбе буенча һәм аның хисабына кимчелекләре булган товарны кире кайтарырга тиеш.
Шул ук вакытта кулланучы шулай ук сыйфатсыз товар сату нәтиҗәсендә китерелгән зыянны тулысынча түләүне таләп итәргә хокуклы.
Кулланучылар хокукларын яклау буенча сораулар килеп туган очракта, сез Татарстан Республикасы Дәүләт алкоголь инспекциясенең Казан территориаль органы белгечләренә консультация сорап мөрәҗәгать итә аласыз.