Кулланучы әлифбасы: сатып алынган суыткычны кире кайтару мөмкинме?
Суыткычны сатып алу мөһим вакыйга булып тора, чөнки мондый техника кыйммәт һәм ул озак еллар дәвамында куллану өчен сатып алына. Сатып алганда, аны кибеткә кайтарып буламы, дип уйлаучылар бар. Суыткычны кире кайтару бу өлкәдә законның төп таләпләрен белмәгәндә баш авыртуына әйләнергә мөмкин.
Суыткычларны кире кайтару турында кулланучылар хокукларын яклау турында Закон нәрсә сөйли?
Гамәлдәге законнар моның өчен билгеләнгән срокларны, кире кайтару кагыйдәләрен, гамәлләрнең эзлеклелеген регламентлый. «Кулланучылар хокукларын яклау турында» 2300-1 номерлы Федераль закон сатып алганнан соң, товарны 14 тәүлек дәвамында кире кайтару мөмкинлеге барлыгын күрсәтә.
Шул ук вакытта суыткыч җиһазларына әлеге норма кагылмый, чөнки ул алмашынырга һәм кире кайтарылырга тиешле булмаган продукция исемлегенә керә (РФ Хөкүмәтенең 31.12.2020 ел, № 2463 карары). 2463 номерлы исемлекнең 11 пункты нигезендә суыткыч көнкүреш билгеләнешендәге техник яктан катлаулы әйбер булып тора, шуңа күрә сыйфатлы товарны, сәбәпләрен аңлатмыйча гына, кире кайтарып булмый.
Мондый техниканы тиешле күләме, габариты, төсләре туры килмәү сәбәпле кире кайтарып булмый. Суыткыч ошамаса, аны кире кайтарырга мөмкинме, дигән сорауга сатучының җавабы тискәре булачак.
Мөһим! Закон нигезендә, суыткыч түләнгән һәм кибеттә складта булган очракта да, аны сатучыга кире кайтарып булмый инде. Товарның тулы бәясен түләү асылда сату-алу килешүенә тиңләштерелә.
Шулай ук суыткыч җиһазлары РФ Хөкүмәтенең 10.11.2011 елның 924 номерлы карары белән расланган техник яктан катлаулы эшләнмәләр исемлегенә кертелгән.
Шуңа бәйле рәвештә суыткыч җиһазларына кире кайтаруның махсус кагыйдәләре тарала. Сатып алучы 15 көн дәвамында аз гына җитешсезлекләр ачыкланганда да кибеткә мөрәҗәгать итәргә һәм товарны алыштыруны, ә аналоглары булмаган очракта – акчаларын кире кайтаруны таләп итәргә хокуклы.