Кулланучы әлифбасы: кимчелекләр ачыкланганда, кар машинасы белән нәрсә эшләргә?
Татарстан Республикасы Дәүләт алкоголь инспекциясенең Чистай территориаль органына гражданин К. сатып алынган кар машинасындагы җитешсезлекләрне ачыклау ситуациясендә кулланучылар хокукларын яклау турындагы законнарга аңлатма бирү үтенече белән мөрәҗәгать итте.
Сатып алучы үзенә бүләк ясарга була һәм Яңа ел алдыннан сатучы белән кар машинасы сату-алу килешүе төзи. Килешү нигезендә сатучы әлеге адрес буенча товарны башка шәһәрдән китергән. Сатып алучы товар китергән кибет хезмәткәре белән берлектә кар машинасының йөреш сыйфатын тикшерергә була, әмма кар машинасы двигатель эшләгәндә хәрәкәт итүдән туктый. Сатучы ватылу сәбәпләрен ачыклау өчен белгеч җибәрергә вәгъдә бирә. Ләкин күп вакыт үтүгә карамастан, белгеч һаман килмәгән. Сатып алучы борчыла башлый һәм ярдәм сорап территориаль орган хезмәткәрләренә мөрәҗәгать итә.
Кулланучыга «Кулланучылар хокукларын яклау турында» РФ Законының 18 статьясындагы 1 пункты (алга таба – Закон) аңлатылды. Техник яктан катлаулы товарга карата кулланучы, кимчелекләр ачыкланган очракта, сату-алу килешүен үтәүдән баш тартырга һәм мондый товар өчен түләнгән сумманы кире кайтаруны таләп итәргә яки аны шул ук маркадагы товарга алыштыруны яисә сатып алу бәясен кулланучыга тапшырган көннән алып унбиш көн эчендә сатып алу бәясен тиешенчә исәпләп чыгарып, башка маркадагы товарга алыштыруны таләп итәргә хокуклы.
Кулланучыга дәгъва проектын әзерләүдә хокукый ярдәм күрсәтелде. Бу вакыйгада кулланучының сатучыга вакытында мөрәҗәгать итүе һәм кесә телефоны аша хәбәр алышу буенча үз таләпләрен белдерүе уңай.
Кулланучы таләпләрен үз теләге белән үтәмәгән очракта, ул судка мөрәҗәгать итәргә хокуклы. Территориаль орган белгечләре, кирәк булганда, дәгъва гаризасы проектын әзерләүдә ярдәм күрсәтәчәкләр.