Кулланучы әлифбасы: тиешле сыйфатлы булган, заказ өчен тегелгән пәрдәләр өчен акчаны кире кайтарып буламы?
Татарстан Республикасы Дәүләт алкоголь инспекциясенең Яр Чаллы территориаль органы Кайнар линия телефонына шалтырату килде:
- Пәрдәләр тегүгә заказ биргәндә, сатучыдан миңа караңгы һәм яктылыкны үткәрми торган блэкаут пәрдәләре тәкъдим итүен сорадым. Баламның яктылыкта йокламавын аңлаттым, шуңа күрә миңа төнге кебек караңгы пәрдәләр кирәк. Тәкъдим ителгән вариантлардан мин бер төрле материал сайладым, һәм алар миңа заказ буенча пәрдәләр тектеләр. Пәрдәләрне бүлмә тәрәзәсенә элеп куйгач, мин алар аша яктылык үтүен күрдем. Аларны кире кайтарырга килгәч, мине тыңламадылар һәм сезгә ошамады, дип гаепләделәр. Реализациягә алырга тәкъдим иттеләр. Бу очракта мин акчаны кире кайтаруны сорап гариза яза аламмы, яисә миңа туры килгән башка пәрдәләргә генә алыштыра аламмы? Бу очракта мин тегү эшенә кабат түләргә тиеш буламмы? Чөнки бу эш кабат башкарылачак, ә бит сатучы миңа характеристикалары буенча яраксыз товар тәкъдим итте. Мин товар чегында күрсәтелгән ИП атамасын гына беләм (касса чегын бирмәделәр) бу таләп белдерү өчен җитәме? Пәрдәләрнең никадәр яктылык үткәрүен раслаучы фотосурәтләр юк, ә пәрдәләрне сатучы үзе сату өчен алып калды (кибеттән чыккач кына минем башыма килде, алар миңа пәрдәләрне 14 көннән соң кире кайтара ала һәм дәгъваны вакытында бирмәгәнне әйтә ала). Бу очракта мин нәрсә эшләргә тиеш?
Татарстан Республикасы Дәүләт алкоголь инспекциясенең Яр Чаллы территориаль органының эчке базарны үстерү һәм координацияләү бүлегенә Чаллы шәһәрендә яшәүче хатын-кыз шундый сораулар белән мөрәҗәгать итте. Әлеге мөрәҗәгатьне җентекләп карау өчен белгечләр тарафыннан сәүдә ноктасында профилактик чара үткәрелде.
Шәхси эшмәкәр белән очрашканда белгечләр гамәлдәге закон нормаларын аңлаттылар:
- Кулланучы сатып алына торган товарлар, күрсәтелә торган хезмәтләр һәм аның заказы буенча башкарыла торган эшләр турында ышанычлы мәгълүмат бирүгә өметләнергә хокуклы:
- иң мөһим куллану үзенчәлекләре турында;
- бәясе турында;
- гарантия чоры турында;
- куркынычсызлык һәм нәтиҗәлелек кагыйдәләре һәм башка мәгълүматлар буенча куллану турында.
Төгәл исемлек «Кулланучылар хокукларын яклау турында»гы Законның 10 статьясында билгеләнгән.
Кулланучыга мәгълүмат бирү бурычы турыдан-туры сатучыга йөкләнә, товар җитештерүчегә, шулай ук хезмәтләр, эшләр башкаручыга да йөкләнгән. Әгәр дә соңгыларның үз йөкләмәләрен тиешенчә үтәмәве нәтиҗәсендә кирәкле мәгълүматлар кулланучыга җиткерелмәсә, ул алга таба килешүдән баш тартырга һәм «Кулланучылар хокукларын яклау турында»гы Законның 12 статьясы нигезендә акчаларны кире кайтаруны таләп итәргә хокуклы.
Кулланучының акчаны кире кайтару, зыянны каплау турындагы таләпләрен кире кагу яки санга сукмау очрагында, ул үз хокукларын суд тәртибендә яклау хокукына ия.