Кулланучы әлифбасы: ватылган товар өчен кем түләргә тиеш?
Татарстан Республикасы Дәүләт алкоголь инспекциясенең Яр Чаллы территориаль органы эчке базарны үстерү һәм координацияләү бүлеге хезмәткәрләре тарафыннан Мамадыш районы кулланучылары һәм эшмәкәрләре өчен күчмә чара үткәрелде. Чыгуның максаты - төрле юнәлештәге мониторинглар үткәрү һәм кулланучылар базары мәсьәләләре буенча профилактик эш алып бару.
Шәһәрнең сәүдә объектларында кулланучыларга, сатучыларга һәм эшмәкәрләргә Россия Федерациясенең 07.02.1992 елның 2300-1 номерлы «Кулланучылар хокукларын яклау турында»гы Законына ярашлы рәвештә үз хокукларын гамәлгә ашыру тәртибе аңлатылды. Районның барлык халкы белгечләргә кулланучылар базары өлкәсенә кагылышлы сораулар бирергә мөмкинлек алды. «Б.» кибетендә сатучыларны түбәндәге сорау кызыксындырды:
- Ватылган товар өчен кем түләргә тиеш?
Белгечләр аңлатты:
- Сатып алучы товар өчен түләгәнче, ул кибет милке булып санала. Шуңа күрә, әгәр дә сатып алучы аркасында берәр нәрсә ватылып зыян күргән булса, ул бу әйбер өчен түләргә тиеш. Ләкин бу гамәлнең махсус эшләнгәнен исбатлаган очракта гына! Кулланучы товар өчен түләргә тиеш түгел, әгәр товар сатучы аркасында зыян күргән булса:
- киштәләр арасында тар юллар;
- товарлар тотрыксыз, шуңа күрә аларга кагылу һәм аларны төшерү җиңел;
- кибеттә юеш идән, ә моның турында кисәтү куелмаган;
- кассир товарлар белән тасманы бик кискен эшләтеп җибәргән, алар шуннан төшеп ватылган очраклар.
Бу очракта сатып алучы кибет милкен бозуда гаепле була алмый, димәк, зыянны да түләргә тиеш түгел! Әгәр явыз ният булган икән (кемдер махсус рәвештә товарны ташлаган яки ваткан булса), шулай ук кунак җәмәгать урынында тәртип бозганда (кулларын селтәгән, йөгергән, сугышкан), аңа кибеткә китерелгән зыянны түләргә туры киләчәк.
Мондый чараларның төп максаты - кулланучылар хокукларын яклау өлкәсендә законнар мәсьәләләре буенча халыкның мәгълүматлылыгын арттыру, кулланучылар базарында мөстәкыйль һәм грамоталы тәртипнең тотрыклы күнекмәләрен формалаштыру.
Яр Чаллы территориаль органы белгечләре ведомство карамагындагы районнарга мондый күчмә чараларны даими рәвештә үткәрә. Чарада катнашучыларның барысына да кулланучы өчен мәгълүмат белән буклетлар һәм «Татарстан кулланучысы хәбәрләре» газетасының соңгы чыгарылышы бирелде, шулай ук Чаллы территориаль органының Кайнар линия телефоны эше турында хәбәр ителде: 8(8552)71-43-03.