Хокукый мәгърифәт сәгате
Татарстан Республикасы Дәүләт алкоголь инспекциясенең Түбән Кама территориаль органы хезмәткәре Чирмешән үзәк китапханәсе хезмәткәрләре өчен хокукый белем бирү сәгате үткәрде. Чара барышында белгеч катнашучыларга «Кулланучылар хокукларын яклау турында» РФ Законы нигезендә кулланучыларның нинди хокуклары булуын һәм аның төп статьяларында нәрсәләр әйтелгәнен, шулай ук кире кайтарылырга тиеш булмаган тиешле сыйфатлы товарлар исемлеген тәкъдим итте.
Румия Сөләйманова кимчелекләре ачыкланган товарны кире кайтаруның ничек башкарылуын аңлатты:
- Үз хокукларыгыздан файдаланып, акчаны кире кайтарырга яки сыйфатсыз товарны тиешле сыйфатлы товарга алыштырырга киңәш итәм. Беренче чиратта товар сатып алынган кибеткә мөрәҗәгать итәргә кирәк. Сыйфатсыз товарны кире кайтарганда, товарның гарантия срогы яки яраклылык срогы тәмамланмавын, әгәр ул билгеләнмәгән булса, акыллы вакытта, әмма товар кулланучыга тапшырылганнан соң ике ел эчендә гамәлдә булуын тикшерергә кирәк. Дәгъвага чекның күчермәсен, товар квитанциясен яки әлеге сатып алуга кагылышлы башка документны кушу максатка ярашлы булачак. Дәгъваның бер экземплярына сатучының, яки дәгъваны кабул иткән башка кешенең, исем-фамилиясе һәм вазифасы, шулай ук дәгъваны кабул итү датасы һәм сатучының мөһерен (булган очракта) күрсәтеп, үз имзасын куюы яхшы. Дәгъваның бу үрнәген сатучыга мөрәҗәгать итүне раслау өчен үзегездә калдырырга кирәк. Әгәр сатучы үз теләге белән акчаны кире кайтарудан яки сыйфатсыз товарны алмаштырудан баш тартса, кулланучы судка гариза белән мөрәҗәгать итәргә хокуклы.
Очрашуда катнашучыларга «Кулланучылар хокукларын яклау турында» РФ Законының төп төшенчәләре, кулланучылар хокукларын яклау өлкәсендәге мөнәсәбәтләрне хокукый җайга салу, Интернетта товарларны кире кайтару һәм алыштыру кагыйдәләре һәм башкалар турында файдалы мәгълүмат белән мәгълүмати буклетлар тапшырылды.