Товарны алмаштыру саны законнар белән чикләнмәгән
Татарстан Республикасы Дәүләт алкоголь инспекциясенең Чистай территориаль органына шәһәрдә яшәүче хатын-кыз телефон аша, үлчәме буенча туры килмәгән сыйфатлы товарны алмаштыру өлешендә Кулланучылар хокукларын яклау турындагы законнарга аңлатма бирүне сорап мөрәҗәгать итте.
Хатын оныгына бүләккә кроссовкалар сатып алган. Әмма киеп караганда аларның зурлыгы буенча туры килмәве ачыклана. Хатын-кыз аларны башка үлчәмгә алыштырырга карар кылган, өстәвенә аяк киеме эксплуатациядә булмаган һәм товар күренеше сакланган. Сатучы бер сүзсез зуррак үлчәмле аяк киеменә алмаш ясаган. Бу юлы оныгына кроссовкаларның төсе ошамый. Хатын тагын сатучы янына бара. Сатучы тагын алмаштырган, тик бу соңгы тапкыр алмаштыру шарты белән. Сатып алучы хатын сорау бирә:
- Ә тиешле сыйфатлы товарны алмаштыру саны буенча чикләүләр бармы?
Кулланучыга «Кулланучылар хокукларын яклау турында» РФ Законының 25 маддәсе аңлатылды. Әлеге статья нигезендә, әгәр күрсәтелгән товар формасы, габаритлары, фасоны, төсе, күләме яки комплектациясе буенча туры килмәгән булса, кулланучы тиешле сыйфатлы азык-төлек булмаган товарны әлеге товар сатып алынган сатучының шундый ук товарына алмаштырырга хокуклы. Кулланучы, сатып алынган көнне исәпләмәгәндә, тиешле сыйфатлы азык-төлек булмаган товарны ундүрт көн эчендә алмаштырырга хокуклы. Тиешле сыйфатлы азык-төлек булмаган товарны алмаштыру, әгәр күрсәтелгән товар кулланылышта булмаса, аның товар төре, куллану үзлекләре, пломбалар, фабрика ярлыклары сакланса, шулай ук товар яисә касса чегы йә күрсәтелгән товар өчен түләүне раслый торган башка документ булса, үткәрелә.
Кулланучының товар яки касса чегы булмау аны шаһит күрсәтмәләренә сылтама ясау мөмкинлегеннән мәхрүм итми. Кулланучы сатучыга мөрәҗәгать иткән көнгә шундый ук товар сатуда булмаган очракта, кулланучы сату-алу шартнамәсен үтәүдән баш тартырга һәм күрсәтелгән товар өчен түләнгән акчалата сумманы кире кайтаруны таләп итәргә хокуклы. Кулланучының күрсәтелгән товар өчен түләнгән акчалата сумманы кире кайтару турындагы таләбе күрсәтелгән товар кире кайтарылган көннән алып өч көн эчендә канәгатьләндерелергә тиеш. Шул ук вакытта закон сатучыга тиешле сыйфатлы товар алмаштыруны таләп итеп мөрәҗәгатьләр санын чикләми.