Риелтор хезмәтләре кулланучының өметләрен акламаган
Татарстан Республикасы Дәүләт алкоголь инспекциясенең Чистай территориаль органына шәһәрдә яшәүче хатын-кыз, кулланучылар хокукларын яклау турындагы законнар нигезендә риелторлык хезмәтләре күрсәтүгә шартнамә төзегәндә кулланучының хокукларын аңлатуны сорап мөрәҗәгать итте.
Ачыкланганча, хатын-кыз фатир арендалау өчен риетор хезмәтләре күрсәтүгә килешү төзегән. Әмма озак вакыт узганнан соң да килешү шартлары үтәлмәгән.
Хатын-кызга юридик затлар һәм шәхси эшмәкәрләр тарафыннан күчемсез милек белән килешү базарында арадашчы хезмәтләрен гамәлгә ашыру белән бәйле мөнәсәбәтләр «Кулланучылар хокукларын яклау турында» РФ Законы гамәлдә булуын аңлаттылар.
Законның 29 статьясындагы 1 пункты нигезендә, әгәр риелторлык хезмәтләре сыйфатсыз күрсәтелсә, ягъни күрсәтелгән хезмәтләрдә билгеле бер кимчелекләр булса, кулланучы үз теләге белән түбәндәгеләрнең берсен таләп итәргә хокуклы:
- күрсәтелгән хезмәт бәясен тиешенчә киметү;
- өченче затлар тарафыннан күрсәтелгән хезмәтнең җитешсезлекләрен бетерү буенча тотылган чыгымнарны каплау.
Моннан тыш, ачыкланган кимчелекләр җитди характерда булса яисә риелторлык хезмәтләре күрсәтү килешү шартларына туры килмәсә, кулланучы килешүне үтәүдән баш тартырга һәм зыянны тулысынча каплауны таләп итәргә хокуклы.
Законның 29 статьясындагы 3 пункты нигезендә күрсәтелгән хезмәтнең җитешсезлекләренә бәйле таләпләр кулланучы тарафыннан хезмәтне кабул иткәндә яисә аны күрсәтү барышында белдерелергә мөмкин.
Кулланучыга сыйфатсыз хезмәт өчен акчаны кире кайтаруны таләп итеп, башкаручыга дәгъва юлларга тәкъдим ителде. Кирәк булган очракта территориаль орган белгечләре хокукый ярдәм күрсәтергә әзер.