Интернет-кибеттә консультация өстәле уздырдылар
Татарстан Республикасы Дәүләт алкоголь инспекциясенең Чистай территориаль органы хезмәткәре Болгар шәһәрендә урнашкан интернет-кибеттә консультация өстәле уздырды. Чара барышында кулланучылар законнарының нигезләре аңлатылды, кибеткә килүчеләргә маркетплейста сыйфатсыз товар сатып алган очракта эш итү механизмы буенча киңәшләр бирелде.
Сатып алучы дефектлы товардан баш тартырга һәм акчаларны кире кайтаруны таләп итәргә хокуклы. Маркетплейс, әгәр ул сатучы булмаса, товарның сыйфаты өчен җаваплы түгел, ләкин кулланучыга сатучы турында тулы мәгълүматны, шул исәптән аның реквизитларын һәм контакт мәгълүматларын бирергә тиеш. Әгәр товар белдерелгән характеристикаларга туры килмәсә, кулланучы сатучыга дәгъва белән мөрәҗәгать итә ала. Дәгъвада түбәндәгеләрне таләп итәргә мөмкин:
- шул ук маркалы, модельдәге яки артикулдагы товарга алмаштыру;
- товарны башка маркалы товарга алмаштыру, бәяләрне яңадан исәпләү;
- сатып алу бәясен тиешенчә киметү;
- сатучы исәбенә товарның кимчелекләрен бетерү яисә аларны төзәтү чыгымнарын каплау;
- түләнгән сумманы кире кайтару һәм сату-алу шартнамәсеннән баш тарту.
Сатучы, үз чиратында, дәгъваны карарга һәм язма җавап бирергә тиеш.
Әгәр сатучы акчаларны кире кайтару яки товарны алыштыру срокларын бозса, ул кулланучыга товар бәясеннән 1% күләмендә вакыты чыккан һәр көн өчен неустойка түли. Моннан тыш, кулланучы, әгәр аның таләпләре ирекле рәвештә канәгатьләндерелмәгән булса, судка мөрәҗәгать итәргә хокуклы.