Гипермаркетта укыту семинары оештырылды
Татарстан Республикасы Дәүләт алкоголь инспекциясенең Чистай территориаль органы эчке базарны үстерү һәм координацияләү бүлеге консультанты «Илфани» гипермаркетында хезмәткәрләр инициативасы белән кулланучылар хокукларын яклау турындагы законнарны аңлату буенча укыту семинары оештырды.
Сатучыларның барлык сораулары тиешле сыйфатлы товарларны кайтаруга, ягъни көнкүреш газ җиһазларын һәм җайланмаларын алмаштыруга кагылган иде.
Кибет хезмәткәрләренә «Кулланучылар хокукларын яклау турында» РФ Законының 25 маддәсе һәм техник яктан катлаулы товарлар исемлеге аңлатылды.
Газ җиһазларыннан техник яктан катлаулы товарларга бары тик бер елдан да ким булмаган гарантия срогы булган ризык әзерләү өчен кулланыла торган электр һәм катнаш газ-электр приборлары гына керә. Законнар нигезендә, тиешле сыйфатлы әлеге товарлар алмашынырга тиеш түгел.
Тиешле сыйфатлы газ үткәргече (шланглар) кулланучы аерым кагыйдәләрне үтәгәндә алмаштырылырга һәм кире кайтарылырга тиеш. Кулланучыга сатып алынган тиешле сыйфатлы товарны алмаштыру хокукы бирә торган төп нигез булып товарның формасы, габаритлары, фасоны, төсе, күләме яки комплектациясе буенча туры килмәве тора. Башка нигезләр каралмый.
Кулланучы тиешле сыйфатлы азык-төлек булмаган товарны сатып алу көнен исәпкә алмаганда, 14 көн эчендә алмаштырырга хокуклы. Шунысын да билгеләп үтәргә кирәк, тиешле сыйфатлы һәр товарны кире кайтарып булмый. Закон чыгаручы алмаштырырга да, кайтарырга да мөмкин булмаган сыйфатлы товарлар исемлеген билгеләде, һәм бу исемлек шактый зур. Моннан тыш, кире кайтару вакытында товар үзенең беренчел үзлекләрен сакларга тиеш: тышкы кыяфәтен, комплектациясен, ярлыкларын, биркаларын, шулай ук килешүне башкару фактын раслый торган товар чегы булырга тиеш.
Әгәр дә товарны кире кайтарган вакытта шундый ук товар сатуда булмаса, товар өчен акчаны кире кайтару мөмкин. Кулланучының акчалата сумманы кире кайтару турындагы таләбе товарны кире кайтарганнан соң өч көн эчендә канәгатьләндерелергә тиеш.
Товарны кибеткә кайтару, кагыйдә буларак, сатып алучының гаризасы нигезендә башкарыла, анда кире кайтаруның сәбәбе һәм кулланучының таләбе кыскача бәян ителә.