Сатып алучы өчен вакыйга уңышлы тәмамланды
Татарстан Республикасы Дәүләт алкоголь инспекциясенең Арча территориаль органы хезмәткәрләренә сәүдә үзәгендә урнашкан консультация пунктына кулланучы үз проблемасы белән мөрәҗәгать итте.
Ул, идәнгә куела торган, яңа газ казанын сатып алган. Бер тәүлек эксплуатациядән соң ул эшләми башлый. Газ хезмәте төзексезлекнең сәбәбен ачыклый алмаган. Сатып алучы Татарстан Республикасы Дәүләт алкоголь инспекциясенең Арча территориаль органына сыйфатсыз товар өчен акчаны кире кайтару мөмкинлеге турында мөрәҗәгать итте.
Белгечләр сатып алучыга «Кулланучылар хокукларын яклау турында»гы Законның 18 статьясы нигезендә, сатып алучы товарны алмаштыруны, бәясен киметүне, түләүсез ремонт ясауны яки акчаларны тулысынча кайтаруны таләп итәргә хокуклы, дип аңлаттылар. Идәнгә куела торган газ казаннары техник яктан катлаулы товарлар категориясенә керми, шуңа күрә таләпне сайлау мөмкинлеге сатып алучыда кала.
Кулланучыга дәгъва әзерләүдә ярдәм күрсәтелгән, һәм нәтиҗәдә сатучы казанның тулы бәясен – 36500 сумны кире кайтарган.