Спас районы кулланучысына гамәлдәге законнарны аңлаттылар
Татарстан Республикасы Дәүләт алкоголь инспекциясенең Чистай территориаль органына Спас районында яшәүчедән, үлчәме буенча туры килмәгән тиешле сыйфатлы куртканы кире кайтару хокукын аңлатуны сорап шалтырату килде.
Кулланучыга «Кулланучылар хокукларын яклау турында» РФ Законының 25 маддәсе аңлатылды. 14 көн дәвамында, сатып алу көнен санамаганда, формасы, габаритлары, фасоны, төсе, күләме яки комплектациясе буенча туры килмәгән сыйфатлы азык-төлек булмаган товарны алмаштырырга мөмкин. Әгәр сатучының мөрәҗәгать иткән көнендә сатып алучыга туры килә торган шундый ук товар булмаса, ул акчаны өч көн эчендә кайтарырга тиеш. Сатып алучы кире кайтара торган әйберне файдаланмавы, анда биркалар, пломбалар, фабрика ярлыклары саклануы мөһим.
Соңрак кулланучы кабат белгечкә шалтыраткан һәм консультациядән соң ул товар сатучысына куртканы башка үлчәмдәгегә алыштыруны таләп итеп мөрәҗәгать иткән. Ләкин сатучыда кирәкле товар булмаган, шуңа күрә аңа акчаны кире кайтарганнар.