Кулланучыга хокукый ярдәм турында
Татарстан Республикасы Дәүләт алкоголь инспекциясенең Чистай территориаль органына сатып алынган «Гранта» автомобилендәге кимчелекләрне ачыклау проблемасы белән җирле ханым мөрәҗәгать итте.
Автомобиль Әлмәт шәһәре салонында агымдагы елның июлендә сатып алынган. Автомобильләрне ремонтлау белән профессиональ шөгыльләнүче аның улы капоттагы лак-буяу өслегенең аз гына дефектын күреп алган. Сатучы проблеманы таный һәм үз хисабына сигнализация урнаштыру белән компенсацияләргә тәкъдим итә. Сатып алучы ризалаша, тәкъдимне кабул итә.
Әмма соңрак, августта, машина түбәсендә тагын шундый ук проблема ачыкланган. Ачыкланган җитешсезлек сатып алучының кәефен кырган әлбәттә, чөнки дефектлар алга таба тарала башлаган. Салон белән элемтәгә кереп, аңа автомобильне карарга көн билгелиләр.
Хатын-кыз башта Дәүләт алкоголь инспекциясенең Чистай территориаль органына консультация сорап мөрәҗәгать итте. Белгечләр аңа «Кулланучылар хокукларын яклау турында»гы закон нигезләмәләрен искәрттеләр: җиңел транспорт техник яктан катлаулы товарлар категориясенә керә, димәк, кулланучы сату-алу шартнамәсен алмаштыруны яки өзүне бары тик җитди төзексезлекләр булганда, ремонт сроклары бозылганда яки еш ремонт ясалу сәбәпле озак вакыт файдалану мөмкин булмаганда гына таләп итәргә хокуклы. Компенсацияне сатучы алдан ук кисәтмәгән яшерен җитешсезлекләргә карата гына таләп итәргә мөмкин.