Кулланучы әлифбасы: онлайн-курслар сатып алганда кулланучылар хокукларын яклау
Татарстан Республикасы Дәүләт алкоголь инспекциясенең Казан территориаль органына кулланучы сорау белән мөрәҗәгать итте:
- «Финанс марафоны» онлайн-курсын сатып алдым, әмма килеп туган хәлләр аркасында катнаша алмыйм. Мондый вәзгыятьтә нишләргә? Аның өчен түләнгән акчаларны кире кайтарып буламы?
Казан территориаль органының эчке базарны үстерү һәм координацияләү бүлеге белгече җавап бирә:
- «Кулланучылар хокукларын яклау турында» 1992 елның 07 февралендәге 2300-1 номерлы РФ Законының 32 маддәсе нигезендә, кулланучы эшләрне башкару (хезмәтләр күрсәтү) турындагы шартнамәне үтәүдән теләсә кайсы вакытта баш тартырга хокуклы, бу шартнамә буенча йөкләмәләрне үтәүгә бәйле фактта тотылган чыгымнарны үтәүчегә түләү шарты белән.
Закон буенча сез онлайн-мәктәптән укуның тулы бәясен яки аның бер өлешен кире кайтаруны таләп итәргә хокуклы. Хәтта килешүдә кире кайтару мөмкин түгел дип күрсәтелсә дә - бу законлы түгел. Акчаларны кире кайтару өчен аны сатучыга (администраторга, модераторга яки онлайн-мәктәп кураторына) мөрәҗәгать итәргә кирәк. Шул ук вакытта уку өчен акчаны ничек түләсәгез дә кире кайтарырга мөмкин: үз акчагыз белән, кредитка яки бүлеп түләнгщн булуга карамастан.
Сатучы асылда тотылган чыгымнар суммасын тотып калырга хокуклы (мәсәлән, исемле сертификат әзерләүгә). Чыгымнарның факттагы суммасы документлар белән расланырга тиеш.
Сатучы акчаны кире кайтару турындагы таләпне үтәүдән баш тартса, сез бозылган хокукларыгызны яклау өчен судка мөрәҗәгать итә аласыз.
Кулланучылар хокукларын яклау буенча Татарстан Республикасы порталында (https://www.tatzpp.ru/) хокукый тәэмин итү (Белем базасы) вкладкасында кулланучыларга киңәшләр, норматив-хокукый база (закон, кагыйдәләр, суд практикасы), актуаль мәгълүмат, аңлатмалар һәм документлар үрнәкләре урнаштырылган.