ЯҢАЛЫКЛАР

Татарстан Республикасы Дәүләт алкоголь инспекциясенең Чистай территориаль органы башлыгы һәм белгечләре 2019 елның 7 маенда Бөек Ватан сугышында Җиңү көне алдыннан Татарстан Республикасы Әлки муниципаль районының Базарлы Матак авылында кулланучылар һәм хуҗалык итүче субъектлар өчен чаралар комплексы үткәрде. Белгечләр Базарлы Матак авыл җирлеге башкарма комитеты бинасында авыл халкы белән очрашу, Башкарма комитет хезмәткәрләре өчен семинар-уку, "КФҮ" ДБУ һәм "Кояш" һәм "Олимп" кибетләрендә кулланучылар өчен консультация өстәлләре, "Алып Хан" сәүдә йортында кизү тору, ветераннар (пенсионерлар) иҗтимагый оешмасы әгъзалары өчен лекция-әңгәмә һәм Татарстан Республикасы Әлки муниципаль районы урта мәктәбендә сыйныфтан тыш дәрес оештырды.

Барлык чаралар да Бөек Ватан сугышында Җиңүнең 74 еллыгы уңаеннан котлау сүзләре белән башланып китте. Арабызда елдан-ел сирәкләнә барган сугыш ветераннарына һәм тыл хезмәтчәннәренә аерым игътибар бирелде.

Чаралар барышында кулланучыларга "Кулланучыларның хокукларын яклау турында" РФ Законы нормалары, Товарларның аерым төрләрен сату кагыйдәләре һәм Россия Федерациясендә халыкка көнкүреш хезмәте күрсәтү кагыйдәләре, шулай ук "2014-2021 елларга Татарстан Республикасында кулланучыларның хокукларын яклауның комплекслы системасын үстерү" программасы турында аңлатып үтелде.

Семинар барышында Башкарма комитет белгечләре белән "Кулланучыларның хокукларын яклау турында” РФ Законының 44 статьясы каралды, аның нигезендә җирле үзидарә органнары кулланучыларның шикаятьләрен карарга, кулланучыларның хокукларын яклау мәсьәләләре буенча консультация бирергә; кулланучыларның хокукларын яклап (билгесезлек кулланучылар даирәсенә) судларга мөрәҗәгать итәргә хокуклы. Моннан тыш, белгечләргә кулланучылардан шикаятьләрнең дәүләт хезмәтләре һәм муниципаль хезмәтләр күрсәтүнең күп функцияле үзәкләре аша кабул ителергә мөмкин булуы хакында да аңлатылды.

Җирле үзидарә органнары вәкилләре сүзләренә караганда, бәйрәм алды көннәрендә сугыш ветераннары һәм тыл хезмәтчәннәре игътибарсыз калмады, һәркемгә бүләк тапшырылды. Май аеның беренче декадасында ветераннарга чәчтарашханәләрдә һәм авыл кибетләрендә реаль ташламалар бирелә.

Территориаль орган белгечләре Татарстан Республикасы Дәүләт алкоголь инспекциясе компетенциясе чикләрендә сорауларга тулы җаваплар бирде.

Кулланучыларга танышу өчен буклетлар һәм "Вестник потребителя Татарстана" газетасы тапшырылды.

Бөек Ватан сугышы тәмамлануга 74 ел тулу уңаеннан Татарстан Республикасы Дәүләт алкоголь инспекциясе Арча территориаль органының әйдәп баручы белгеч-эксперты Гөлназ Шакирова Балтач муниципаль районында ТР Хезмәт министрлыгының "Наз" халыкка комплекслы социаль хезмәт күрсәтү үзәгендә Бөек Ватан сугышы ветераннары һәм тыл хезмәтчәннәре белән әңгәмә үткәрде.

Әңгәмә барышында "Кулланучыларның хокукларын яклау турында" Россия Федерациясе Законының төп нигезләмәләре, Россия Федерациясе Хөкүмәтенең 1998 елның 19 гыйнварындагы 55 номерлы карары белән расланган Товарларның аерым төрләрен сату кагыйдәләре турында мәгълүмат җиткерелде. Товарларны кире кайтару, сыйфатсыз товарларны алыштыру тәртибе, гарантия ремонтын үткәрү һәм товарның сыйфатын тикшерү сроклары, формасы, габаритлары, фасоны, төсе, үлчәме яки комплектациясе буенча туры килмәгән товарны алмаштыру мөмкинлеге турында аңлатмалар бирелде. Һәр кулланучы грамоталы булырга, үз хокукларын яклый белергә тиеш, з зарурлык булган очракта ул һәрвакыт Татарстан Республикасы Дәүләт алкоголь инспекциясе белгечләре ярдәменә исәп тота ала.

Очрашуда катнашучылар үзләрен кызыксындырган барлык сорауларга тулы җаваплар алды һәм мондый чаралар ешрак үткәрелсен иде, дигән теләк белдерде.

ТР Дәүләт алкоголь инспекциясенең Түбән Кама территориаль органы хезмәткәрләре ел саен Җиңү көнен бәйрәм итүгә һәм Бөек Ватан сугышы ветераннарын һәм анда катнашучыларны, шулай ук аларга тиңләштерелгән затларны хөрмәтләүгә багышланган берничә чара үткәрә. Бүген, бәйрәм алды уңаеннан, Мөслимнең өлкәннәр һәм инвалидлар өчен интернат-йортына контроль-инспекция бүлеге белгече Елизавета Низамова һәм Россия Пенсия фондының Татарстан Республикасы Мөслим районы бүлеге вәкиле килде. Дәүләт учреждениеләре хезмәткәрләре мәгълүмати-танып-белү әңгәмәләрен үткәрде, сорауларга җавап бирде.

Тыныч күк йөзебез өчен өлкәннәр адресына җылы рәхмәт сүзләре, игелеклелек һәм озын гомер теләкләре яңгырады, татлы бүләкләр тапшырылды. 

Нәтиҗәле кулланучылар базарын үстерү кулланучылар базарында товарларга һәм хезмәт күрсәтүләргә дөрес таләпләр куя торган, намуссыз сатучыларга һәм башкаручыларга, сыйфатсыз товарларга һәм хезмәтләргә карата катгый таләпләр билгеләүче таләпчән кулланучыны тәрбияләүдән башка мөмкин түгел. 

Гражданнарның хокукый аң-белем дәрәҗәсен күтәрү, аларга кулланучы культурасы күнекмәләрен сеңдерү максатында башкарма хакимият һәм җирле үзидарә органнары тарафыннан мәгълүмати-агарту эшенең төп юнәлешләре киң кулланыла:

- халыкның киң даирәсенә кулланучыларның хокуклары һәм әлеге хокукларны гамәлгә ашыру һәм яклау буенча чаралар турында массакүләм мәгълүмат чаралары һәм Интернет-ресурслар ярдәмендә хәбәр итү;

- яшьләрдә кулланучы культурасын тәрбияләү һәм товарлар һәм хезмәт күрсәтүләр сатып алганда үз-үзеңне дөрес тотарга өйрәтү;

- эшкуарлык эшчәнлеге субъектларының хокукый грамоталылыгын арттыру.

Кулланучыларның хокукларын яклау өлкәсендә хокукый белемнәрне пропагандалау максатыннан, халык арасында КФҮ белән үзара эшчәнлек алып барыла, анда кулланучылар базарының төрле өлкәләрендә кулланучыларның хокукларын яклау мәсьәләләре буенча гражданнарны даими рәвештә консультацияләп, кабул итүләр үткәрелә. КФҮ халыкка билгеле һәм таныш. Нәкъ менә шунда кулланучыларның хокукларын яклау буенча гражданнарны консультацияләү алымнарын үткәрү максатка ярашлы. Бу – халык белән хезмәттәшлекнең тагын бер коралы, ул закон белән ныгытылган. "Кулланучыларның хокукларын яклау турында" РФ Законының 44 статьясында муниципаль дәрәҗәдә кулланучылар белән үзара бәйләнеш чыганагы буларак күп функцияле үзәкләр телгә алына.

Шундый алымнарның берсе Җиңү Көне алдыннан Алексеевск ш.т.п. КФҮдә уздырылды. Чараны 7 майда Татарстан Республикасы Дәүләт алкоголь инспекциясенең Чистай территориаль органы һәм Роспотребнадзорның Татарстан Республикасы идарәсе белгечләре Алексеевск районы башкарма комитеты вәкиле белән берлектә үткәрде. Чара барышында законнар нигезендә кулланучыларның хокукларын гамәлгә ашыру мәсьәләләре яктыртылды, товарлар сатып алганда барлыкка килә торган конкрет хәлләрдә үз-үзеңне дөрес тоту буенча мисаллар китерелде. 

Кулланучыларның хокукларын яклау темасы өлкән яшьтәге кешеләргә аеруча кызыклы булды һәм тыңлаучыларда билгеле бер хәлләрне җайга салуга кагылышлы күп кенә сораулар тудырды. Кулланучыларның хокукларын яклау өлкәсендә белгечләрнең гомуми бурычы – халыкка хезмәт күрсәтү сыйфатын күтәрү, аларның хокукларын яклау һәм мөмкин булган хәвеф-хәтәрләрне мөмкин кадәр киметү.

1941-1945 еллардагы Бөек Ватан сугышында Җиңүнең 74 еллыгын бәйрәм итү кысаларында белгечләр ведомство карамагындагы районнарда ветераннар һәм өлкәннәр өчен үткәрелә торган төрле очрашуларда, лекцияләрдә, акцияләрдә катнаша.

Без бүген яшибез, яратабыз, киләчәккә планнар корабыз, укыйбыз яки эшлибез – боларның барысы да 1945 елда Бөек Ватан сугышында яуланган Җиңү нәтиҗәсе. Кызганыч, Бөек Ватан сугышында катнашучылар арабызда юк диярлек, әмма бу Җиңү өчен рәхмәт әйтү һәм сугыш чоры балаларына, хезмәт ветераннарына ярдәм итү мөмкинлеге бар.

 Әлмәт территориаль органы хезмәткәрләре бәйрәм алдыннан Әссәдуллиннар, сугыш ветераны Абдуллин Мәдинә Садершәһит кызы һәм ялгыз тыл хезмәткәре Миңнегалимов Яшәр Миңнегалим улы гаиләсен якынлашып килүче Бөек Җиңү бәйрәме белән котлады. Аларга яшәеш тәме, ныклы сәламәтлек, күңел тынычлыгы, якын кешеләр җылысын һәм мәхәббәт теләделәр.

Өлкәннәргә кайгыртучанлык, игътибар бүләк итү, алар белән аралашу әлләни катлаулы түгел, ләкин бик мөһим нәрсә. Ветераннар яшь буынның рәхмәтен тоеп, кирәкле ярдәмне алып яшәсен өчен омтылырга кирәк. 

Мотоблок нигә кирәк? Бу сорауга җавап, бәлки, ачыктан-ачык та күренеп торадыр. Ләкин беркайчан да мотоблоктан файдаланмаган кеше өчен ул гаять мөһим булырга мөмкин. Мотоблок – ул зур һәм чагыштырмача кыйммәт булмаган, күп функцияле машина. Мотоблок сайлаганда, аның тракторны түгел, ә көрәк белән китмәнгә алмаш булуын истә тотарга кирәк.

Мотоблок – авыл хуҗалыгы билгеләнешендәге универсаль агрегат, аңа кирәкле эш җайланмаларын беркетеп, дачаларда һәм фермер хуҗалыкларында уңышлы гына файдаланырга мөмкин. Әлеге җайланма кырда яки бакчадагы эшләрне җиңеләйтү өчен булдырылган.

Әгәр сезнең 6 сутыйдан артык җир кишәрлегегез була, анда яшелчә, бәрәңге, җиләк-җимешләр, чәчәкләр өчен туфрак әзерләве бер дә җиңел хезмәт түгел, бигрәк дә сезонга берничә мәртәбә эшләргә туры килгәндә. Ә шул урыннардан мотоблок белән үтүе күпкә җиңелрәк. Моннан тыш, сөрү белән туфрак йомшарту өстенә, күп кенә башка операцияләрне башкара торган агрегатлар да бар.

Сатып алыр алдыннан, иң элек, үзегез өчен кайсы мотоблок кирәк булуын тәгаен аныклагыз: профессиональ булсынмы ул яки һәвәскәрлек өчен генә кирәкме? Әгәр бакчагыз иң күбе 7 сутый булса, кыйммәтле машинага чыгым тотуы урынлы да булмас. Андый очракта һәвәскәрләр мотоблогына өстенлек бирергә мөмкин. Ә инде бакчагыз 20 сутый һәм аннан да зуррак икән, Сезнең өчен ярымпрофессиональ мотоблок кулай булачак.

Мотоблок бензин двигателе яки электропривод белән җиһазландырылырга мөмкин. Электр приводлы җайланма май салуны, ягулык белән өстәмә тәэмин итүне, йә булмаса нинди дә булса башка төрле карап торуны таләп итми. Алардан файдалануы бик җиңел, моның өчен токка тоташтырырга һәм төймәсенә генә басарга кирәк. Ләкин мондый җиңел мотоблокларның тискәре яклары да юк түгел: алар кечкенә мәйданнарны гына эшкәртә, электр шнурының озынлыгына карап, куәте дә зур түгел, шулай ук электр тогыннан йогынты алу куркынычы да бар. Бензин двигателендә эшләүче мотоблокларның куәте зуррак. Тискәре яклары буларак, даими рәвештә май алмаштыруны һәм ягулык өстәп торуны, шулай ук файдаланганда тавышының көчле булуын әйтергә була.

Файдалы киңәш: Һава суыту двигателенең тәгәрмәчендә төрле механизмнарны әйләндерә торган җайланма (крыльчатка) бар, ул әйләнеп торган вакытта радиаль юнәлешләрдә һаваны "куа". Двигатель тәгәрмәче дә (маховичк), югарыда телгә алган җайланма да (крыльчатка) күн белән томаланган, әлеге күн яклагыч үзлеге белән берлектә, мотоблокның куркынычсыз эшләвен дә тәэмин итә, шул ук вакытта двигатель күчәре буйлап крыльчаткадан һава агымын юнәлтеп тора. Шуңа күрә дә яклагыч күне салдырылган килеш мотоблок белән эшләргә ярамый, чөнки двигателе кирәгеннән артык кызарга мөмкин. Сатып алган очракта уңышлар телибез, кишәрлектәге эшләрегез нәтиҗәле булсын.

2019 елның апрелендә спирт һәм алкогольле продукция җитештерү һәм сату күләмнәре турында мәгълүматлар кабул итү 2019 елның 1 маеннан 14 маена кадәр автоматлаштырылган рәвештә гамәлгә ашырылачак.

1945 елның 9 мае көннән-көн ерагая бара, әмма ләкин әби-бабаларыбызга Җиңүнең нинди юллар белән бирелүен без элеккечә хәтерлибез. Шул чор геройларын ел саен зур ихтирам белән искә алабыз.

2019 елның 6 маенда, Бөек Җиңү бәйрәме алдыннан, ТР Дәүләт алкоголь инспекциясенең Арча территориаль органы эчке базарны үстерү һәм координацияләү бүлеге белгечләре ТР Хезмәт, халыкны эш белән тәэмин итү һәм социаль яклау министрлыгының Арча районы Яңа Кенәр авылындагы "Мәрхәмәт үзәге" дәүләт автоном социаль хезмәт күрсәтү учреждениесендә Бөек Ватан сугышы ветераннары һәм тыл хезмәтчәннәре өчен чара үткәрде. Сәүдә, торак-коммуналь хуҗалык хезмәтләре, түләүле медицина хезмәтләре, җәмәгать туклануы хезмәтләре, шулай ук товарларда (эшләрдә, хезмәт күрсәтүләрдә) җитешсезлекләр ачыкланганда кулланучыларның хокукларына бәйле консультацияләр бирелде. Чара барышында кулланучылар өчен файдалы мәгълүмат тупланган буклетлар һәм "Вестник потребителя Татарстана" газетасы өләшенде.

Ветераннар һәм тыл хезмәтчәннәре турында бүген без аерым җылылык белән сөйлибез. Алар безнең өчен бүгенге тормышны булдырган, горурланырлык бар нәрсәне яклаган һәм саклап кала алган. Әлеге батырлык өчен без бүген "рәхмәт" дип әйтә алырлык кешеләр бик аз калды. Бүгенге яшьләр һәм киләчәк буыннар әлеге мөһим көнне һәм аңа бәйле булган һәрнәрсәне истә тотып, хөрмәт итсен иде, дип ышанасы килә.

2019 елның 7 маенда Арча районының Урта Пошалым авылында (Үрнәк авыл җирлеге) Татарстан Республикасы Дәүләт алкоголь инспекциясенең Арча территориаль органы җитәкчесе Булат Кадыйров һәм Татарстан Республикасы Дәүләт алкоголь инспекциясенең Арча территориаль органы эчке базарны үстерү һәм координацияләү бүлеге җитәкчесе Ләйсән Абдуллина катнашында урынга чыгып гражданнар кабул ителде.

Очрашуга килгән халыкны сатып алынган товарларның сыйфаты, гарантия срогы үткән чорда да, шулай ук гарантия срогы чыккач та, товарларны кире кайтару сроклары, икмәк-күмәч эшләнмәләренә һәм сөт продуктларына сәүдә өстәмәләре, кире кайтарылмый торган сыйфатлы товарлар турындагы сораулар, алкогольле продукцияне сату вакытына кагылышлы чикләмәләр кызыксындыра иде. Бирелгән барлык сорауларга да ТР Дәүләт алкоголь инспекциясе компетенциясе чикләрендә аңлатмалар бирелде.

Гражданнарны кабул иткәннән соң авыл җирлеге белгечләре өчен кулланучыларның хокукларын яклау мәсьәләләре буенча укулар үткәрелде. Катнашучылар өчен әлеге мәсьәлә бик кызыклы иде. Чөнки, авыл халкы белән тыгыз эш алып баруга бәйле рәвештә, аларның үзләренә дә төрле сораулар белән мөрәҗәгать итәләр икән. Закон нигезләмәләрен аңлату барышында алар үзләрен кызыксындырган сорауларны да бирде. Төрле низаглы хәлләрне мисаллар нигезендә ачыкладылар.

Чарада катнашкан һәркемгә халыкның кулланучы белемен киңәйтү өчен бүлек реквизитлары белән "Кулланучылар өчен белешмәлекләр" буклетлары, "Вестник потребителя Татарстана" газетасы өләшенде.

Бу көннәрдә Бөек Ватан сугышы ветераннарын хөрмәтлиләр һәм Татарстан Республикасы Дәүләт алкоголь инспекциясенең Арча территориаль органы да бу изге эштән читтә калмады. Матур традиция буенча, 7 майда территориаль орган җитәкчесе Булат Кадыйров һәм территориаль органның эчке базарны үстерү һәм координацияләү бүлеге җитәкчесе Ләйсән Абдуллина Бөек Ватан сугышы ветераннарын якынлашып килүче бәйрәм белән котлап, алар янына барып кайттылар.

Бөек Җиңүнең 74 еллыгы алдыннан территориаль орган җитәкчесе бүләкләр тапшырды. Ветераннар территориаль орган хезмәткәрләрен шатланып каршы алды һәм бүләкләрне зур рәхмәт әйтеп кабул итте. Өлкән буын вәкилләре янә җиңел булмаган сугыш елларын һәм Җиңү хакына барган батырлыкларны искә төшерде.

Очрашу барышында ветераннарга һәм тыл хезмәтчәннәренә Татарстан Республикасы Дәүләт алкоголь инспекциясенең функцияләре һәм бурычлары, "Кулланучыларның хокукларын яклау турында" РФ Законының төп нигезләмәләре турында аңлатылды. "2018 елда продукцияне лаборатор тикшерү нәтиҗәләре буенча йомгаклау материаллары" мәгълүмат бюллетене, территориаль органның элемтә мәгълүматлары белән визитка һәм кулланучылар өчен файдалы мәгълүмат урнаштырылган "Вестник потребителя Татарстана" газетасы тапшырылды.