ЯҢАЛЫКЛАР
Совет халкының Бөек Ватан сугышында Җиңүенең 74 еллыгын бәйрәм итү уңаеннан Түбән Кама территориаль органы хезмәткәрләре мөстәкыйль рәвештә, шулай ук җирле хакимият органнары, халыкны социаль яклау, иҗтимагый оешмалар белән тыгыз элемтәдә торып та, пенсионерларга һәм инвалидларга комплекслы социаль, мәгълүмати-консультацион һәм хокукый ярдәм күрсәтүгә юнәлдерелгән чаралар үткәрә.
Бүген Түбән Кама территориаль органы белгече Эльвира Милочкина Зәй шәһәренең "Радость" халыкка комплекслы социаль хезмәт күрсәтү үзәгендә өлкән буын белән очрашты. Мондый чараларның максаты – өлкәннәргә үз хокуклары турында яхшырак белергә һәм үз мәнфәгатьләрен якларга өйрәнергә ярдәм итү, шулай ук алдау очракларына ничек тарымаска, кырыкалдарлар йогынтысына ничек бирешмәскә кирәклеге турында да белү.
Өлкән яшьтә булуы аркасында пенсионерлар дару чараларыннан, медицина җиһазларыннан һәм эшләнмәләреннән файдаланучылар арасында иң күп санлы кулланучылар төркеме булып тора. Товарларның әлеге категориясе белән эш иткәндә күп кенә сораулар туа. Мисал өчен, бер ир: "Тонометрны кайтарырга яки алмаштырырга мөмкинме?" – дип, консультация сорап мөрәҗәгать итте, аның фикеренчә, әлеге аппарат кан басымын дөрес күрсәтми икән. Халыкка барлык юридик консультацияләр дә бушлай күрсәтелә. Белгеч "Кулланучыларның хокукларын яклау турында" РФ Законының 18 статьясы нигезендә кулланучының төзексезлеге ачыкланган товарны кире кайтару яки алыштыру хокукына ия булуы турында аңлатты. Ләкин шунысын да истә тотарга кирәк, әлеге статья нигезендә сатучының да приборның сыйфатына карата тикшерү үткәрү хокукы бар. Еш кына сатучы белән сатып алучы арасында товардагы җитешсезлекнең килеп чыгуна бәйле сәбәпләрдә бәхәс килеп туа. Мондый очракта сатучы, җитешсезлек товарга гарантия срогы дәвамында барлыкка килгәндә, үз хисабына экспертиза үткәрергә тиеш.
Очрашу азагында Эльвира Милочкина барысын да якынлашып килүче бәйрәм белән котлады һәм ныклы сәламәтлек теләде!
Татарстан Республикасы Дәүләт алкоголь инспекциясенең Казан территориаль органы хезмәткәрләре Җиңү көненә багышланган чаралар уңаеннан мебельләр һәм халык куллана торган башка товарларны әзерләү һәм сату буенча хезмәтләр күрсәтүче оешмаларның хезмәткәрләре белән берничә очрашу үткәрде. Очрашуда катнашучыларга сугыш һәм тыл ветераннарының, шулай ук сугыш чоры балаларының бөек казанышлары турында искә төшерделәр. Шуны истә тотарга кирәк: бүген безнең геройлар бик өлкән кешеләр, үзләренә игътибарлы һәм ихтирамлы мөнәсәбәткә, хакимият вәкилләреннән дә, бизнес вәкилләреннән дә һәрьяклап ярдәм кулы сузуга мохтаҗ булган сәламәтлекләре нәзберек кешеләр.
Тыңлаучыларга "Кулланучыларның хокукларын яклау турында" 1992 елның 7 февралендәге 2300-1 номерлы Россия Федерациясе Законының төп нигезләмәләре, Россия Федерациясе Хөкүмәтенең 1998 елның 19 гыйнварындагы 55 номерлы белән расланган Товарларның аерым төрләрен сату кагыйдәләре турында сөйләделәр.
Сыйфатсыз һәм сыйфатлы товарларны кире кайтару һәм алыштыру белән бәйле хәлләрне караганда, дәгъва белдерү ысулларына һәм тәртибенә, кулланучыларның хокуклары һәм бурычларына кагылышлы мәсьәләләр буенча фикер алыштылар.
Белгеч үзенең чыгышында Татарстан Республикасы Дәүләт алкоголь инспекциясе, ведомствоның кулланучылар хокукларын яклау өлкәсендәге вәкаләтләре турында кыскача мәгълүмат җиткерде.
Төрле хезмәтләр күрсәтелгәндә һәм эшләр башкарылганда сыйфатсыз товарларга, җитешсезлекләр ачыклануга бәйле сораулар килеп туган очракта, Казан территориаль органына мөрәҗәгать итәргә киңәш ителде, биредәге хезмәткәрләр әлеге мәсьәләләрне хәл итүдә булышлык күрсәтергә әзер.
Очрашуда катнашучыларга кулланучыларның хокукларын яклау өлкәсендәге мәсьәләләрне хәл итү турында мәгълүмат урнаштырылган басма продукция таратылды.
2019 елның маенда без Бөек Ватан сугышында Җиңүнең 74 еллыгын бәйрәм итәбез! 74 нче тыныч май аен бәйрәм итәбез!
Тыныч күк йөзебез, бәхетле балачагыбыз, лаеклы тормышыбыз өчен Бөек Ватан сугышы ветераннарына, тыл хезмәтчәннәренә, сугыш чоры балаларына ЗУР КЕШЕЛЕКЛЕ рәхмәт белдерәбез!
Бәйрәм алдыннан, Җиңү бәйрәме белән котлау өчен, ныклы сәламәтлек һәм озын гомер теләп, ТР Дәүләт алкоголь инспекциясенең Чаллы территориаль органы җитәкчесе Г.Т.Вафина, җитәкче урынбасары Л.Р.Муллина, эчке базарны үстерү һәм координацияләү бүлеге белгечләре белән берлектә, Татарстан Республикасы Тукай районында яшәүче ветеранның хәлен белеште.
Быел Хәсәншин Сәетгәрәй Сафа улы 88 нче туган көнен билгеләп үтә. Ел саен үзен Җиңү бәйрәме белән котларга килүче кунакларны Сәетгәрәй Сафович зур рәхмәт белән каршы алды. "Мине онытып бетермәвегез, яныма килүегез, игътибарыгыз һәм күрсәткән хөрмәтегез өчен ихлас рәхмәтлемен, яшь буын безнең халыкка кичерергә туры килгәнне хәтерли һәм үсеп килүче буынны үзенең тарихын белергә, Ватаныбыз өчен авыр еллар турында истә тотарга өйрәтә", – ди Сәетгәрәй бабай.
Гөлшат Вафина ветеранга истәлекле бүләк тапшырды, чәй өстәле артында сөйләшкәндә Сәетгәрәй бабай еш кына балачагын искә төшерде. Үзенең оныклары Һәм оныкчыклары (ә алар: 4 бала, 7 онык һәм 9 оныкчык), басуда узган катлаулы хезмәт һәм хыялланган ак икмәк кисәге турында сөйләде. "Җиңү – ул безнеке, без аны кан белән яуладык", – ди Сәетгәрәй Хәсәншин.
Сәетгәрәй бабай – Күперле авылының горурлыгы, картлык көнендә аны дустанә гаилә кайгыртып яши һәм ул зур игътибар үзәгендә. Хезмәт сөючән балаларына ул: "Хезмәтегезне һәм бер-берегезне хөрмәт итегез!" – дип нәсыйхәт бирә.
ТР Дәүләт алкоголь инспекциясенең Чаллы территориаль органы коллективына Сәетгәрәй Сафа улы рәхмәт белдерде, барча коллективка һөнәри уңышлар, дуслык һәм ярдәмчеллек, сәламәтлек теләде.
Бүген Яшел Үзән территориаль органы хезмәткәрләре Апас районы Сатмыш авылында яшәүче тыл хезмәтчәне, 1930 елда туган Ситдыйкова Фәһимә Хәлиловнаны Бөек Җиңү Көне белән котлады.
– Авыр еллар булды, – дип искә ала ул, – сугыш чорының барча авырлыгы балалар җилкәсенә күчте.
Әти-әниләре гаиләсендә алар җиде бала булган, әтиләре фронтка киткән. Фәһимә, унике яше тулып җитмәсә дә, колхоз кырларында эшләгән, урман кисү белән шөгыльләнгән. Билгеләнгән биремне үтәгәндә 300 грамм икмәк бирә торган булганнар, үтәмисең икән, икәмәксез калдырганнар. 1943 елда әтисенең вафаты турында коточкыч хәбәр алына.
Фронтовиклар һәм тыл хезмәтчәннәре, толлар, сугыш балалары алдында түбәнчелек белән баш иябез! Бүген безнең буын хәрби һәм тыныч хезмәтегез, тормыш зирәклеге һәм актив гражданлык позициясе өчен сезгә ихлас рәхмәт белдерә.
Беренче Май бәйрәмнәрендә Татарстан Республикасы Дәүләт алкоголь инспекциясенең Чистай территориаль органы белгечләре юридик затлар һәм шәхси эшкуарлар белән үзара бәйләнешкә кермичә уздырылган контрольлек чаралары барышында 3 очракта алкогольле продукцияне ваклап сатуда вакыт чикләмәләренең сакланмаганлыгын ачыклады. Кибеттәге сатучылар, тыюга карамастан, гражданнарга иртәнге сәгать 10 кадәр сыра сатканнар. Шулай итеп, тыелган сәгатьләрдә сыра сатуның ике факты – Нурлат районында, берсе Алексеевск районында ачыкланган.
Әйтик, Алексеевск районы Биләр авылында "Сказка" кибетендә иртәнге 8 сәгать 55 минутта әлеге кибеттә сату эшчәнлеген гамәлгә ашыручы шәхси эшкуар таныш булмаган ир-атка 1,35 литр күләмендә сыра саткан. Аның аңлатмаларына караганда, ул сыраны сәгатькә карамау сәбәпле тыелган вакытта саткан.
Хәзерге вакытта тикшерү материаллары административ хокук бозу турындагы эш кузгату стадиясендә.
Кулланучылар еш кына "Кибет территориясендә түләнмәгән товарны очраклы рәвештә зарарлаганда нәрсә эшләргә?" дигән сорау белән мөрәҗәгать итә. “Мондый товар өчен без түләргә тиешме, әгәр юк икән, кайсы законга сылтама ясарга?” Әлеге сорауларга ТР Дәүләт алкоголь инспекциясенең Чаллы территориаль органы эчке базарны үстерү һәм координацияләү бүлеге белгечләре аңлатма бирә. Әгәр сез очраклы рәвештә кибеттәге товарга, әйтик, киштәдәге минераль су шешәсенә зыян салгансыз һәм ул ватылган икән, бу хәл товар өчен түләүдән алдарак барлыкка килгән икән, кибет хезмәткәрләре Сездән бозылган товарга түләүне таләп итәргә хокуклы түгел. Түләү вакытына кадәр кибеттәге товарга хилафлык китерү мөлкәтнең очраклы рәвештә һәлак булу яки зыян күрү хәтәре булып тора. Гражданлык хокукы буенча, милекче сатып алачак әйберне очраклы рәвештә һәлак итү яки аңа зыян салуның ихтимал тискәре нәтиҗәләре (сарыфлар) өчен кем җаваплы була дигән мәсьәләне хәл итү – милекчелек хокукының (оператив идарә итү хокукының) күчү вакытын билгеләүгә бәйле.
Әгәр шартнамәдә башкасы каралмаган булса, сатып алыначак әйберләрнең очраклы рәвештә һәлак ителү яки бозылу хәтәре өчен җаваплылык милекчелек хокукы белән бер үк вакытта сатып алучыга күчә. Димәк, гомуми кагыйдә буенча, әйбернең һәлак булуына яки җимерелүенә бәйле рәвештә китерелгән сарыфлар (хәтәр) өчен аларның милекчесе җаваплы була, әмма ләкин яклар шартнамәдә моның башка тәртибен дә күздә тота ала, мисал өчен, әйберне очраклы рәвештә һәлак итү хәтәре өчен, аның бәясен түләгән вакыттан башлап, сатып алучы җаваплы була. Шартнамәдә башкача каралмаган булса, мөлкәтне очраклы һәлак итү яки аңа зыян салу хәтәре өчен, РФ Гражданлык кодексының 211 статьясы нигезендә, кибет җаваплы була. Бу очракта, товар өчен кассада түләнгәнчегә кадәр, кибет милекче булып тора.
Әйберләр сатып алырга ниятләгәндә, моңа охшаш хәлләргә тарымас өчен, Сездән пөхтә булуыгызны һәм нәни балаларны күз уңыннан ычкындырмавыгызны сорыйбыз. Кибетләргә булган сәфәрләрегез күңелле һәм сыйфатлы булсын!
Бүген "Казан марафоны-2019" җиңел атлетика буенча халыкара ярышлары башланып китте, аларның концепциясе иң зур халыкара стартлар уздыруга нигезләнгән. Ярышлар барышында түбәндәгечә чабышлар оештырылачак: "TIMERBABY" ползуноклары чабышы, "TIMERKIDS" балалар чабышы, 3 км, 10 км, 21,1 км һәм 42,2 км аралыкларга йөгерү. Чара стартына бөтен дөнья буйлап барлыгы 30 000 якын спортчы һәм һәвәскәр йөгерешче чыкты. Алар арасында Җәүдәт Әхмәтханов җитәкчелегендә ТР Дәүләт алкоголь инспекциясе белгечләре дә катнашты. 2017 елда Татарстан Республикасы Президенты Р.Н.Миңнеханов "TIMERMAN" спорт чараларының комплекслы программасын булдыру инициативасын хуплады, ул спортның биш төре буенча ярышларны үз эченә ала: җиңел атлетика һәм чаңгы узышлары, йөзү һәм велоузышлар сериясе, триатлон. Чара республика халкы арасында спортны һәм сәламәт яшәү рәвешен популярлаштыруга юнәлдерелгән. Һәр катнашучы партнерлардан бүләкләр һәм финишта уникаль медаль алды. Ярышларда катнашучыларның дөньякүләм парадына бушлай бару һәм "Пицца" музыка төркеме концертын карау чарада катнашкан һәркем өчен күңелле бонуска әйләнде.
Хөрмәтле коллегалар! Сезне халыкара бәйрәм – Яз һәм Хезмәт бәйрәме белән котлыйм!
1 май – бай тарихлы бәйрәм. Әлеге дата үз башлангычын 1886 елның 1 маенда, эшчеләрнең киң колачлы протест белдерү акциясе узган Американың Чикаго шәһәрендә ала. Түзеп булмый торган шартлардан алҗыган кешеләр эш сәгатьләрен тәүлегенә 8 сәгатькә кадәр киметүне таләп итә. Митинг куелган максатка ирешсә дә, шул ук вакытта күп санлы корбаннарга да китерә. 1917 елгы Октябрь революциясеннән соң бу бәйрәм Россиядә рәсми статус ала. РСФСРда ул башта "Интернационал көне" дип, соңрак "Хезмәт ияләренең халыкара бердәмлеге көне" дип атап йөртелә. 1992 елда бәйрәм "Яз һәм Хезмәт бәйрәме" дип үзгәртелә. Бәйрәм язның соңгы аена туры килсә дә, 1 Май җылылык башлану символы булып санала.
Бәйрәм уңаеннан сезгә сәламәтлек, гаилә җылысы һәм иминлек, эшегездә уңышлар һәм тыныч күк йөзе телим!
ТР Дәүләт алкоголь инспекциясе җитәкчесе – Җәүдәт Әхмәтханов.
Татарстан Республикасы Дәүләт алкоголь инспекциясенең Чистай территориаль органына бер ир-ат мөрәҗәгать итте, ул Казан шәһәрендәге кибеттән җиңел автомобиль өчен трансмиссия подшипнигын сатып алган булган, ә ул исә үлчәме буенча туры килмәгән. Сервис үзәгендә подшипникны урнаштырган вакытта аның тиешле урынына туры килмәве ачыкланган. Берничә көннән соң кулланучы кибеткә товарны алыштыру таләбе белән мөрәҗәгать итә, әмма сатучы исә товарга тикшерү уздырырга кирәк, чөнки товарның кулланылган булуы хакында шикләнүе турында белдерә. Бер атнадан соң кулланучыга, кулланылышта булуы сәбәпле, товарны алыштырудан баш тарту хакында хәбәр итәләр. Кулланучы моның белән килешми, чөнки товарда аннан файдалану эзләре юк һәм була да алмый. Кулланучы Татарстан Республикасы Дәүләт алкоголь инспекциясенең Чистай территориаль органына мөрәҗәгать иткәч, сатып алу көнен санамаганда, унбиш көн узган була. Өстәвенә, сатучыга подшипникны кире тапшырганда нинди дә булса документларның да рәсмиләштерелмәгәнлеге ачыклана. Барысы да намуслы сүздә оештырылган, һәм инде хәзер товар сатучыда калган. Кулланучыга сатучыдан, товарның кулланылышта булуы сәбәпле, кулланучы таләпләрен канәгатьләндерүдән баш тарту турында рәсми документ сорарга тәкъдим ителде. Шуннан соң товарга бәйсез экспертиза үткәрергә һәм үз хокукларын яклауны сорап судка мөрәҗәгать итәргә туры киләчәк.
Чистайда яшәүче бер кеше Татарстан Республикасы Дәүләт алкоголь инспекциясенең Чистай территориаль органына кәрәзле телефон сатучы салоннарның берсенә карата дәгъва гаризасы проектын әзерләүдә булышлык күрсәтү үтенече белән мөрәҗәгать итте. Әлеге кеше узган ел башында смартфон сатып алган булган. Товарның гарантия срогы – 12 ай. Сатып алганнан соңгы уникенче айда товарда җитешсезлекләр барлыкка килгән, ә атап әйткәндә – смартфон сүнгән һәм инде бүтән кабынмаган. Кулланучы товарны сатучыга гарантия ремонтына тапшырырга мәҗбүр була. Ремонттан соң телефонны кабул иткәндә анда механик хилафлык урыннары барлыкка килгән – экраны корпусыннан аерылып тора башлаган, панель белән пыяла арасында ярык пәйда булган. Шуңа бәйле рәвештә товарны сатучыга ремонтлау өчен янә тапшырырга туры килгән. Ләкин товардагы җитешсезлек бетерелмәгән. Шуннан соң кулланучы сатучыга җимерелгән телефон өчен акчаны кире кайтару таләбе белән язмача дәгъва юллаган, тик аңа бу эшне башкарудан баш тартканнар. Дәгъва гаризасында кулланучы судтан смартфон сату-алу шартнамәсен өзүне һәм җаваплы як тарафыннан смартфон бәясен каплауны, акча кайтару турында таләпне үтәү вакытын кичектергән өчен кичектерүнең һәр көне өчен товар бәясенең 1%ы күләмендә неустойка түләтүне сораган. Җаваплы як тарафыннан ихтирамсыз мөнәсәбәт аркасында барлыкка килгән, үзенең бозылган хокукларын яклау өчен судка мөрәҗәгать итәргә мәҗбүр булуы аркасында рухи кичерешләргә китергән әхлакый зыянны кулланучы 5000 сум күләмендә бәяләгән. Суд кулланучының таләпләрен канәгатьләндерер һәм кулланучы таләпләрен ихтыяри нигездә канәгатьләндермәгән өчен җаваплы яктан кулланучы файдасына суд билгеләгән суммадан 50% күләмендә штраф түләттерер, дип өметләнәбез.