ЯҢАЛЫКЛАР

2019 елның 14 маенда ТР Дәүләт алкоголь инспекциясенең Әлмәт территориаль органы эчке базарны үстерү һәм координацияләү бүлеге белгечләре В.Р.Шәрәфетдинова һәм Ю.А.Петрова Әлмәт шәһәрендәге "Ветеран" инвалидларны тернәкләндерү үзәгендә ветераннар белән очрашты

2019 елның 13 маенда Теләче районының "Теләче җирлекара китапханәсе" МБУ гражданнар өчен чара оештырылды, аның барышында "Кулланучыларның хокукларын яклау турында" РФ Законының төп нигезләмәләре, Россия Федерациясе Хөкүмәтенең 1998 елның 19 гыйнварындагы 55 номерлы карары белән расланган Товарларның аерым төрләрен сату кагыйдәләре, сыйфатсыз товарлар сатып алганда барлыкка килә торган низаглы хәлләрне җайга салу тәртибе, көнкүреш билгеләнешендәге техник катлаулы товарларны сату үзенчәлекләре, башкарылган эшләрдә җитешсезлекләр ачыкланганда эш кылу тәртибе турында аңлатылды. Очрашуда катнашучылар үзләрен кызыксындырган барлык сорауларга тулы җаваплар алды һәм мондый чаралар ешрак үткәрелсен иде, дигән теләк белдерде.

Чарада катнашучыларның барысына да төрле мәсьәләләрне яктырткан һәм территориаль органнарның элемтә белешмәләре урнаштырылган "Памятка потребителю" буклетлары таратылды

2019 елның 14 маенда хуҗалык итүче субъектларның һәм халыкның хокукый грамоталылыгын арттыру, кулланучылар базарында хокук бозуларны кисәтү, кулланучылар мәсьәләләрен оператив хәл итү максатыннан Татарстан Республикасы Дәүләт алкоголь инспекциясенең Арча территориаль органы хезмәткәре, Кукмара муниципаль районы Башкарма комитетының территориаль үсеш бүлеге белгече белән берлектә, кулланучыларның хокукларын яклау өлкәсендәге мәсьәләләр буенча гражданнарны кабул итте.

Әлеге чарада сәүдә өлкәсендәге мәсьәләләр күтәрелде, аерым алганда: сыйфатсыз товарлар сату һәм мондый хәлләрне төрле очракларда хәл итү юллары. Кабул итү барышында мөрәҗәгать итүчеләргә "Кулланучыларның хокукларын яклау турында" 1992 елның 7 февралендәге 2300-1 номерлы Россия Федерациясе Законы нигезләмәләре, Россия Федерациясе Хөкүмәтенең 1998 елның 19 гыйнварындагы 55 номерлы карары белән расланган Товарларның аерым төрләрен сату кагыйдәләре һәм Кире кайтарып яки башка үлчәмдәге, форма, габарит, төстәге яки комплектациядәге шундый ук товарга алыштырып булмый торган товарлар исемлеге буенча аңлатмалар бирелде. Чара барышында кулланучыларның хокукларын яклау буенча мәгълүмати-агарту буклетлары таратылды.

Татарстан Республикасы Дәүләт алкоголь инспекциясенең Чистай территориаль органы белгечләре 2019 елның 13 маенда гражданин гаризасы буенча Чистай районының Татар Сарсазы авылында урнашкан "Сарсаз" кибетенә чыгып, планнан тыш тикшерү үткәрде.

Әлеге кибеттә эшчәнлек алып баручы җаваплылыгы чикләнгән җәмгыятьнең сәүдә объектында алып барылган контрольлек чаралары барышында яраклылык вакыты узган 20 шешә сыра сатылуы ачыкланды.

Моннан тыш, тикшерү барышында ачыкланганча, кибеттә сатыла торган барлык сыра продукциясенә карата тиешле товар документлары да юк иде. Шуңа бәйле рәвештә 204,5 л күләмендә алкогольле продукция сатудан алынды һәм Чистай территориаль органында саклана.

 Хәзерге вакытта әлеге материал буенча административ тикшерү эше алып барыла.

Җиңү Көне –ул геройлык, батырлык һәм Ватанны саклаучылар символы. Бу безнең ата-бабаларыбызның данын арттыру, бөек Россия, сугышсыз тынычлык өчен көрәшергә өндәү. Җиңүле 1945 ел тарихка күбрәк кергән саен, без Россия язмышын хәл иткән Җиңүчеләр буыны батырлыгының бөеклеген ныграк аңлый төшәбез.

 Әлмәт территориаль органы белгечләре Бөек Ватан сугышында Җиңүнең 74 еллыгына багышланган бәйрәм чараларында катнашты.

 Иртә таңнан Әлмәттә яшәүче меңләгән кеше, предприятиеләрнең хезмәт коллективлары, җәмәгать оешмалары вәкилләре, мәктәп укучылары, студентлар Татарстан нефтенең 60 еллыгы исемендәге паркта Мәңгелек утка, сугышта һәлак булучыларны искә алып, исән калганнарны хөрмәтләп, чәчәкләр салды. Әлмәт территориаль органы хезмәткәрләре дә чәчәк салуда катнашты.

 Тантаналы марш астында Ленин мәйданында тынлы оркестр башкаруында студентлар һәм укучылар, кадетлар, Әфганстанда һәм Төньяк Кавказда сугыш хәрәкәтләрендә катнашучылар һ.б. тезелгән колонналар үтте.

 Марш атлаучылар артыннан хәрби техника колоннасы үтте. Аларның һәркайсы сугыш елларының берсен һәм аның иң әһәмиятле мизгелләрен гәүдәләндерә иде.

 Бәйрәм программасы мәйданда спорт мәктәпләре, федерацияләр һәм балалар иҗат коллективлары чыгышлары белән дәвам итте. Әлмәтлеләр һәм шәһәр кунаклары өчен Гагарин урамында үзешчән сәнгать артистлары концерты, фотозоналар оештырылды, сәүдә рәтләре эшләде. Теләге булган һәркем солдатның чын төшке ашын – тушенка кушып пешерелгән хуш исле карабодай боткасыннан авыз итеп, баллы чәй татып карый алды. "Юбилейный" спорт сарае мәйданында хәрби техника күргәзмәсе оештырылды. 

 Шулай ук Әлмәт территориаль органы хезмәткәрләре 9 май көнне чираттагы тапкыр барлык россиялеләр белән бергә Бөек Ватан сугышында җиңү өчен гомерләрен биргән туганнары портретлары белән бәйрәм колоннасында узып, "Үлемсез полк" россиякүләм акциясендә дә катнашты.

 Безнең бурыч – Бөек Ватан сугышы ветераннарына ярдәм итү, хәзерге вакытта  тыныч күк астында яшәвебез һәм сугыш дәһшәтләре турында хикәятләрдән генә укып белүебез өчен рәхмәт белдерү.

Дөньяда чит-ятларның хис-кичерешләренә һәм хикәятләренә караганда, үзенең хис-тойгыларына азрак ышанган кешеләр күп түгел. Моның нигезендә кеше психологиясенең объектив факторы ята: үз хис-тойгыларыңа гына ышаныч белдерү. Азык-төлек товарларын җитештерүчеләр һәм сатучылар продукцияне алга этәрүнең әлеге ысулын дегустация дип атый.

Сәүдә киштәләрендә сыйфатлы товарларның, шул исәптән алкогольле продукциянең күп төрле булуы – ул һәрвакыт яхшы сату, сатып алучыларда зур кызыксыну, сәүдәнең файда китерүе дигән сүз, шуңа күрә дә дегустация кебек промо-акциянең максаты клиентларга билгеле бер продукцияне татып карау мөмкинлеген бирүдән гыйбарәт. Республикада җитештерелгән продукциягә дегустацияләр Алексеевск районында даими үткәрелә. Әлеге чараларда Чистай территориаль органы белгечләре дә катнаша, кулланучылар белән турыдан-туры аралашканда, гамәлдәге законнарга аңлатмалар һәм консультацияләр бирелә.

Кулланучылар һәм клиентлар белән танышу, шулай ук республикада җитештерелгән алкоголь продукциясенә карата лояльлек дәрәҗәсен арттыру максатларында 2019 елның 8 маенда Алексеевск ш.т.п. "Виктория 1" кибетендә "Алкоторг" ҖЧҖ сәүдә вәкиле тарафыннан "Татспиртпром" АҖ продукциясенә дегустация уздырылды. Кулланучыларга продукция составы турында сөйләделәр, алар аның тышкы кыяфәтен генә бәяләп калмыйча, "Тундра" ликеры һәм "GLEN RIVERS" виские белән дә таныша алды.

Дегустациягә куелган эчемлекләрнең тәм сыйфатын кулланучылар уңай бәяләде.

Уңайлы коляскада яңа туган сабый белән йөрүе куркынычсыз, әлбәттә, ләкин урамда төрле хәлләр килеп чыгарга мөмкин. Иң мөһим аспект – коляска тотрыклылы һәм аның тормоз системасы ялгыш кына тиеп китүдән үзлектән китмәслек яки әйләнеп капланмаслык дәрәҗәдә ышанычлы булырга тиеш. Колясканың салмак хәрәкәт итүе күбесенчә аның тәгәрмәчләренең ышанычлы булуына һәм амортизация механизмнарының сыйфатына бәйле. Ышанычлы амортизация нәтиҗәсендә сабый юлдагы чокыр-чакырларны сизми дә калачак.

ТР Дәүләт алкоголь инспекциясенең Чаллы территориаль органы эчке базарны үстерү һәм координацияләү бүлегенә сатып алынган товарны алыштыруда ярдәм итүне сорап, бер кулланучы мөрәҗәгать итте. Яшь әти-әни кибеттән бала коляскасы сатып алган һәм бер кулланып караганнан соң ук тәгәрмәчләре белән проблема килеп туган – аның берсе "очып киткән". Кулланучы үзе раславынча, колясканы алар фатирдан урамга алып чыкканда да, кире алып кергәндә дә кул белән күтәргәннәр. Колясканы алмаштыруга һәм зарурлык очрагында экспертиза үткәрүгә бәйле рәвештә кибеткә мөрәҗәгать иткәннән соң, сатучы аларның дәгъваларын кире каккан. Кулланучыларның хокукларын яклау белгечләре сәүдә ноктасына чыгып, кибет җитәкчесе һәм хезмәткәрләре белән консультация әңгәмәсе үткәрде. Әңгәмә барышында "Кулланучыларның хокукларын яклау турында" 1992 елның 7 февралендәге 2300-1 номерлы РФ Законының төп нигезләмәләре аңлатылды, әлеге норматив акт товар сатылганда кулланучы белән сатучы арасында барлыкка килүче мөнәсәбәтләрне җайга сала. Шулай ук РФ Хөкүмәтенең 55 нче карарында расланган Товарларның аерым төрләрен сату кагыйдәләренең кулланучыларның үзләренә турыдан-туры кагыла торган бүлекләре дә аңлатылды. Уздырылган эш нәтиҗәсендә кибет җитәкчелеге колясканы, сатып алган бәясен яңадан хисаплап, шундый ук коляскага алмаштыру турында карар кабул итте. Яшь әни яңа коляскадан канәгать калды һәм бүлек хезмәткәрләренә күрсәткән ярдәмнәре өчен рәхмәт белдерде.

ГОСТ нормативлары балалар өчен коляскаларның барлык төрләрен дә җентекле тикшерергә кирәклеген күрсәтә, әйтик яңа туган сабыйлар коляскасы 10 тест уза, әлеге тикшерүләр барышында аның юлның 10 градуслы авышлыгына тотрыклы булу-булмавы, 5-15 килограмм авырлыкка чыдамлылык дәрәҗәсе тикшерелә. Шунысын истә тотарга кирәк: ГОСТ яңа туган бала коляскаларының аларның тотрыклылыгын билгели торган нормативларга туры килүен күздә тота. Фәкать әлеге тестларны узган эшләнмәләргә генә сыйфат сертификаты бирелә, шуңа күрә дә коляскаларны сертификацияле продукция сатучы махсус кибетләрдән генә сатып алырга киңәш итәбез.

Бәйрәм алдыннан Татарстан Республикасы Дәүләт алкоголь инспекциясенең Чистай территориаль органы белгечләре 1941-1945 еллар Бөек Ватан сугышында Җиңүнең 74 еллыгын бәйрәм итүгә багышланган чаралар оештыруда катнашты. Ведомство карамагындагы барлык районнарда да кулланучыларның хокукларын яклау буенча, шул исәптән Бөек Ватан сугышы ветераннары һәм тыл хезмәтчәннәре өчен пенсионерлар көндез булган үзәкләрдә, ветераннар клубларында, кабул итүләр, очрашулар, акцияләр, лекцияләр үткәрелде. Чаралар барышында һәркем кулланучыларның хокукларын яклаучы законнар нигезендә аңлатмалар, консультацияләр һәм үз сорауларына җаваплар алу мөмкинлегенә ия булды.

Хуҗалык итүче субъектларга өйрәтү семинарлары, түгәрәк өстәлләр барышында кулланучыларның хокукларын яклау өлкәсендә законнар турында гына аңлатылып калмыйча, елдан-ел сафлары сирәгәя барган Бөек Ватан сугышы ветераннарына һәм тыл хезмәтчәннәренә реаль ташламалар бирү мәсьәләсе дә каралды. Мондый эш нәтиҗәсендә майның беренче декадасында сугыш ветераннарына һәм тыл хезмәтчәннәренә чәчтараш хезмәтләренә сизелерлек ташламалар бирелде. Барлык районнарда 9 май көнне Җиңү көненә багышланган тантаналы митинглар узды. Әйтик, Чистай шәһәренең үзәк мәйданында 10 сәгатьтә предприятиеләрнең һәм оешмаларның, уку йортларының коллективлары җыелды. Биредә Бөек Ватан сугышында Җиңүнең 74 еллыгына багышланган тантаналы митинг булды. Чистай муниципаль районы башлыгы Дмитрий Иванов чистайлыларны истәлекле вакыйга белән котлады. Барлык котлаулардан соң чарага җыелучылар Бөек Ватан сугышында һәлак булучыларны бер минут тынлык белән искә алып, автоматлардан өч тапкыр залп яңгыратылды. Аннан соң үзәк мәйданда хәрби техника парады башланып китте, предприятие һәм оешма коллективларының бәйрәм колонналары узды, алар Мәңгелек утка һәм Советлар Союзы Геройлары – чистайлыларның стелаларына тәкыя салу өчен юнәлде. Татарстан Республикасы Дәүләт алкоголь инспекциясенең Чистай территориаль органы коллективы дустанә колонна булып узды. Коллектив Советлар Союзы Геройлары һәм Сугышчан Дан орденының тулы кавалерлары стеласына чәчәкләр салды. Бәйрәм Скарятин бакчасында дәвам итте, анда Бөек Ватан сугышында катнашучылар һәм тыл хезмәтчәннәре өчен өстәлләр әзерләнгән иде, "Кыр кухнясы" эшләде. Моннан тыш, шәһәр халкы үзешчән сәнгать коллективлары, ветераннар хоры, яшь башкаручылар, бию төркемнәре катнашында искиткеч концерт карады. Бәйрәм Скарятин бакчасында концерт һәм фейерверк белән тәмамланачак.

2019 елның 9 маенда Арча шәһәренең үзәк мәйданында түбәндәге чаралар узды:

- Волонтерлар һәм "Яшь гвардиячеләр" тарафыннан уздырылучы, Бөек Җиңүгә багышланган акцияләр.

- Әдәби-музыкаль мәйданчыклар һәм "Җиңүгә багышлана…" интерактив зоналары.

- Бөек Ватан сугышында Җиңүнең 74 еллыгына багышланган тантаналы парад.

- Митинг.

- Бәйрәм концерты.

Татарстан Республикасы Дәүләт алкоголь инспекциясенең Арча территориаль органы хезмәткәрләре митингта, "Үлемсез полк" хәрәкәтендә катнашты. Арча территориаль органы җитәкчесе Булат Кадыйров һәм Арча территориаль органының эчке базарны үстерү һәм координацияләү бүлеге җитәкчесе Ләйсән Абдуллина Советлар Союзы Герое Леонид Соколов һәйкәленә чәчәкләр салды.

Җиңү Көне алдыннан ТР Дәүләт алкоголь инспекциясендә белгечләр Бөек Ватан сугышы ветераны Фәррах Хәйретдинов белән очрашты. ТР Дәүләт алкоголь инспекциясе җитәкчесе Җәүдәт Әхмәтханов коллектив исеменнән кунакны чын күңелдән котлады, аңа сәламәтлек һәм озын гомер теләде. Аннан сугыш ветераны Фәррах Хәйретдин улы үткән еллар турындагы хатирәләре белән уртаклашты, Берлинга кадәр барлык сугыш чорын искә төшерде. 

 Хәйретдинов Фәррах Хәйретдин улы 1918 елның 29 декабрендә Сарман районы Сарайлы авылында туган. 1935 елда техник училищега керү өчен Казан шәһәренә килгән.

1939 елның 15 апрелендә Фәррах Хәйретдин улын армиягә алалар. Хезмәтне ул Монголиядә 37нче зенит дивизиясендә башлый. Хезмәт итә башлап, 15 көн узгач японнарга каршы хәрби операциядә катнаша, әлеге операциягә Георгий Жуков җитәкчелек итә. Халкин-Гол районында совет-монгол гаскәрләренең япон армиясенә каршы киң колачлы сугыш гамәлләре алып барыла. Япон гаскәрләре хәтта тыныч халык белән дә каты кылана. Август азагында совет гаскәрләре Халкин-Голдагы 6 нчы япон армиясен чолгап ала һәм тар-мар итә, шуннан соң япон хөкүмәте Мәскәүдә тынычлык килешүен төзергә мәҗбүр була.

Сугышлар туктатылганнан соң Фәррах Хәйретдин улы хәрби училищега укырга керә.

1939 елның 1 сентябрендә Германия фашистлары Польшага һөҗүм итә, Икенче Бөтендөнья сугышы башлана. Польшадан соң фашистлар Австрия, Чехословакия, Франция һәм Норвегияне яулый. Европаның унике иле фашистлар кулына төшерелә.

1939 елның 10 декабреннән "лежный" батальонының танк-пулемет ротасы составында Фәррах Хәйретдин улы фин сугышында катнаша.

Гайрәтле җиңүләр белән канатланган Германия 1941 елның 22 июнендә Советлар Берлегенә каршы аяусыз сугыш башлап җибәрә. 190 коры җир дивизиясе, 5000 самолет һәм 200 хәрби кораб безнең илгә һөҗүм итә. Дошман җитди сугышка һәм анда җиңү яулауга өмет итә. Ләкин 1941 ел көзендә әлеге планнар Мәскәү янында чәлпәрәмә килә. Бу сугышларда Фәррах Хәйретдин улы махсус бүлекнең беренче разведгруппасы сафларында сугыша.

Аннан соң Фәррах Хәйретдин улы Сталинград сугышында катнаша, анда каты гына аягы яралана. Аякны кисү мәсьәләсе калкып чыга, ләкин якташ хирург, уңышлы операция ясап, аякны саклап кала һәм өч айдан соң Фәррах Хәйретдин улы янә сафка баса.

1943 елның августында ук ул Курск Дугасындагы гаять зур сугышта катнаша.

1945 елның 29 маенда Фәррах Хәйретдин улын Монголиягә кайтаралар. 

1945 елның 6 августында Америка хәрби көчләре Япониянең Хиросима шәһәренә атом бомбасын ташлый, 9 августта Нагасаки шәһәре дә бомбага тотыла. 1945 елның * августында СССР Япониягә каршы сугыш игълан итә һәм Маньчжуриядә япон гаскәрләренә каршы хәлкиткеч һөҗүм ясый. Фәррах Хәйретдин улы бу сугышларда да катнаша.

1946 елда Фәррах Хәйретдин улын мобилизациялиләр. Бу вакытка ул майор исемен алган була.

Туган иле аның ватан каршындагы казанышларын югары бәяли:

• фин сугышында катнашкан өчен – Кызыл Йолдыз ордены;
• Сталинград оборонасы һәм Курск янындагы сугыш өчен – Дан ордены; 1 һәм 2 дәрәҗә Бөек Ватан сугышы ордены; "Сугыш казанышлары өчен" медале; "Сталинград сугышы өчен" медале; "Берлинны алган өчен" медале, "Япония белән сугыш өчен" медале.

Моннан тыш, Фәррах Хәйретдин улының Георгий Жуков шәхсән үзе бүләк иткән исемле сәгате һәм Бөек Ватан сугышында Җиңү кысаларында төрле даталар уңаеннан тапшырылган башка бик күп бүләкләре дә бар.

Хәйретдинов Фәррах Хәйретдин улы өенә кайткач озак вакытлар буе синтетик каучук заводы каршындагы янгын частендә (ВПЧ-13) эшли. Лаеклы ялга чыккач, "Татспиртпром" ААҖ сагында күпмедер вакыт эшләп ала. Фәррах Хәйретдин улы сугыш һәм хезмәт ветераны.