Нинди соң ул – «Кулланучы почмагы»?
Татарстан Республикасы Дәүләт алкоголь инспекциясенең Түбән Кама территориаль органы эчке базарны үстерү һәм координацияләү бүлеге хезмәткәрләре районның сәүдә объектларында консультация характерындагы күчмә чаралар үткәрде, аларның төп максаты - кулланучылар белән бәхәсле мөнәсәбәтләрдә эшмәкәрләрнең хокукларын һәм бурычларын аңлатудан гыйбарәт иде. Белгечләр аңлатканча, кулланучылар хокукларын яклау турында закон сатучы белән клиент арасындагы мөнәсәбәтләрне җайга сала һәм кулланучыларның бозылган хокукларын торгызу механизмы булып тора.
Сатучы турында мәгълүмат булуга аерым игътибар бирелде, чөнки еш кына кулланучыларда нинди дә булса аңлашылмаучанлык туганда, алар теге яки бу товарның кемдә сатып алынганын һәм кемгә мөрәҗәгать итә алганын белми. Кулланучылар хокукларын яклау турында Закон сатучыдан оешманың исемен, аның адресын һәм эш режимын кулланучыга җиткерүне таләп итә. Эшкуар кулланучыга дәүләт теркәве һәм аны гамәлгә ашырган ФСНС турында мәгълүмат бирергә тиеш. Норматив актлар кулланучы почмагын бизәү буенча конкрет таләпләр билгеләми. Мәгълүмат ачык һәм аңлаешлы формада җиткерелергә тиеш, диелә. Димәк, почмакны сатып алучы яки клиент иркенләп һәм махсус рөхсәтсез генә килеп җитә ала торган урында урнаштырырга кирәк. Мәгълүмат актуаль булырга тиеш, шуңа күрә, «Кулланучылар хокукларын яклау турында» закон нормаларына яки башка актларга үзгәрешләр кертелгән очракта, брошюраларны яки басмаларны гамәлдәгеләргә алыштырырга кирәк. Дөрес рәсмиләштерелмәгән Кулланучы почмагы яки аның булмавы - кулланучылар хокукларын бозу булып санала, моның өчен штрафлар һәм административ җаваплылык каралган.
Очрашу ахырында белгечләр чарада катнашучыларны кызыксындырган барлык сорауларга җентекле аңлатмалар бирделәр, шулай ук файдалы мәгълүмати материал тараттылар.