Кулланучы әлифбасы: сатучы җитештерүче билгеләгән гарантия срогын киметергә хокуклы түгел
Татарстан Республикасы Дәүләт алкоголь инспекциясенең Чистай территориаль органына телефон аша гражданин Х., гарантия срогы дәвамында газ җылыткычында җитешсезлекләр ачыкланган ситуациядә кулланучылар хокукларын яклау турындагы законнарга аңлатма бирүне сорап мөрәҗәгать итте.
Сатып алучы узган елның октябрь аенда газ колонкасы сатып алган. Гарантия талоны нигезендә товарга гарантия вакыты 24 ай тәшкил итә. Быел декабрьдә кимчелекләр ачыклана. Газ хезмәте хезмәткәрләре колонканың җитешсезлеге турында акт төзи. Кулланучы әлеге документ нигезендә сатучыга товарны яңага алмаштыру таләбе белән мөрәҗәгать иткән. Әмма сатучы, кибетнең бер елга гына гарантия бирүен күрсәтеп, алмаштырудан баш тарткан.
Кулланучыга «Кулланучылар хокукларын яклау турында» РФ Законының 5 статьясындагы 7 пункты (алга таба – Закон) аңлатылды. Әлеге статьяның мәгънәсе буенча сатучы җитештерүче заводка караганда озаграк гарантия срогын (өстәмә йөкләмә) билгеләргә хокуклы. Моннан тыш, сатучы товарга җитештерүче билгеләмәгән очракта гарантия срогын билгеләргә хокуклы. Сатучының өстәмә йөкләмәсенең эчтәлеге, мондый йөкләмәнең гамәлдә булу вакыты һәм мондый йөкләмә буенча кулланучының хокукларын гамәлгә ашыру тәртибе кулланучы белән сатучы арасындагы килешү нигезендә билгеләнә.
Югарыда бәян ителгәннәрдән чыгып, кулланучы гарантия срогы дәвамында сатучыга законның 18 статьясында каралган теләсә нинди таләпне, товарны алыштыру да, сыйфатсыз товар өчен акчаны кире кайтаруны да күрсәтергә хокуклы.
Икенче көнне кулланучы үз таләпләренең үтәлүен һәм газ колонкасын яңага алыштыру турында хәбәр итте.