Яраклылык вакыты чыккан товарларны сату закон белән тыела
Килешегез, яраклылык срогы чыккан продукцияне сатып алу, хәтта бу алкоголь продукциясенә (сырага) кагылса да, бик үк күңелле күренеш түгел.
Татарстан Республикасы Дәүләт алкоголь инспекциясенең Түбән Кама территориаль органына шәһәрдә яшәүче бер хатын-кыз шәһәр кибетләренең берсендә сыра сатып алуга шикаять белән мөрәҗәгать итте, аны куллану срогы тугыз көн элек тәмамланган. Яраклылык вакыты чыккан товарларны сату закон белән тыела («Кулланучылар хокукларын яклау турында» РФ Законының 5 маддәсе). Сатучы яраклылык срокларын күзәтергә һәм, әгәр бу срок беткән булса, товарларны вакытында киштәләрдән җыеп алырга тиеш.
Куллану вакыты чыккан продукция табылганда сатып алучының гамәлләре «Кулланучылар хокукларын яклау турында» РФ Законының 18 маддәсе һәм РФ ГК 503 маддәсе белән бәйле:
- Товарны кире кайтарып, аның өчен түләнгән акчаны кире алырга мөмкин. Сатып алучының куллану вакыты чыккан продукцияне алыштыру хокукы бар. Сатучы якның товарны алмаштырудан яки аның бәясен компенсацияләүдән баш тартуы нигезле булырга тиеш. Чек булмау, төргәкнең төзек булмавы яки продуктны өлешчә куллану баш тарту өчен сәбәп була алмый. Таләп кулланучы тарафыннан сатучы оешма җитәкчесе исеменә ике нөсхәдә рәсмиләштерелә.
Бу очракта кулланучы әлеге юлдан барырга теләми һәм сатучы җәза алырга тиеш, дип карар кыла. Территориаль орган хезмәткәрләре юридик затка карата РФ КоАП 14.43 маддәсенең 2 өлеше буенча административ хокук бозу турында беркетмә төзеделәр. Эш материаллары карар кабул итү өчен Татарстан Республикасы Арбитраж судына җибәрелде.